കരുവന്നൂർ കേസിൽ പ്രധാനമന്ത്രിയുടെ ഇടപെടൽ, പണം തിരികെ നൽകും, നിയമോപദേശം തേടിയിട്ടുണ്ടെന്ന് പ്രധാനമന്ത്രി

തിരുവനന്തപുരം : കരുവന്നൂർ കേസിൽ പ്രധാനമന്ത്രി ഇടപെടുന്നു. തട്ടിപ്പിന് ഇരയായ നിക്ഷേപകർക്ക് പണം തിരികെ നൽകുന്നതുമായി ബന്ധപ്പെട്ട് നിയമോപദേശം തേടിയിട്ടുണ്ടെന്ന് പ്രധാനമന്ത്രി നരേന്ദ്രമോദി വ്യക്തമാക്കി. ഇഡി പിടിച്ചെടുത്ത 90 കോടിയുടെ സമ്പാദ്യങ്ങൾ നിക്ഷേപകരിലേക്കെത്തിക്കാനുള്ള നീക്കങ്ങൾ നടത്തുമെന്നും പ്രധാനമന്ത്രി പറഞ്ഞു.

” കരുവന്നൂർ ബാങ്ക് തട്ടിൽ ഇഡി കൃത്യമായ അന്വേഷണം നടത്തുന്നുണ്ട്. രാഷ്‌ട്രീയപ്രേരിതമായി ഇഡി പ്രവർത്തിക്കുന്നുവെന്നതിൽ അർത്ഥമില്ല. അഴിമതി തടയണമെങ്കിൽ അന്വേഷണ ഏജൻസികൾ സ്വാതന്ത്ര്യത്തോടെ പ്രവർത്തിക്കേണ്ടതുണ്ട്. അതിനാൽ ഇഡിയുടെ അന്വേഷണത്തിൽ ഞാൻ ഒരിക്കലും ഇടപെടില്ല. അതിനുള്ള അധികാരം പ്രധാനമന്ത്രിക്കില്ല. പാവങ്ങൾ കഷ്ടപ്പെട്ട് സമ്പാദിച്ച പണം അവരിലേക്ക് തന്നെ തിരികെ എത്തണമെന്നാണ് ആഗ്രഹം. പാവങ്ങളുടെ പണമെടുത്ത് വസ്തുവകകൾ വാങ്ങി കൂട്ടിയവർക്കെതിരെ കർശന നടപടി സ്വീകരിക്കും.”- പ്രധാനമന്ത്രി പറഞ്ഞു.

ഒരു സ്വകാര്യ ചാനലിന് നൽകിയ അഭിമുഖത്തിലാണ് പ്രധാനമന്ത്രി ഇക്കാര്യം വ്യക്തമാക്കിയത് തെരഞ്ഞെടുപ്പ് വിഷയമായല്ല കേന്ദ്രസർക്കാർ ഈ പ്രശ്‌നത്തെ കാണുന്നത്. ഇത് സാധാരണക്കാരന്റെ പ്രശ്‌നമാണ്. ഇത് പരിഹരിക്കാനുള്ള നീക്കങ്ങൾ കേന്ദ്രസർക്കാർ നടത്തുമെന്നും 2014ന് ശേഷം നിരവധി അനധികൃത സ്വത്തുക്കൾ കണ്ടുകെട്ടിയെന്നും പ്രധാനമന്ത്രി പറഞ്ഞു.