ഖാലിസ്താൻ അനുകൂലിയായ വാരീസ് ദേ പഞ്ചാബ് തലവൻ അമൃത്പാൽ സിംഗ് അറസ്റ്റിലായി.

ജലന്ധർ . ഖാലിസ്താൻ അനുകൂലിയായ വാരീസ് ദേ പഞ്ചാബ് തലവൻ അമൃത്പാൽ സിംഗ് ജലന്ധറിൽ അറസ്റ്റിലായി. മണിക്കൂറുകൾ നീണ്ട തിരച്ചിലുകൾക്ക് ഒടുവിലാണ് പഞ്ചാബ് പൊലീസ് ജലന്ധറിന് സമീപം നാകോദാറിൽ നിന്ന് അമൃത്പാലിനെ പിടികൂടുന്നത്. അമൃത്പാലിനെ പിടികൂടാൻ വൻ സന്നാഹങ്ങളാണ് പഞ്ചാബ് പൊലീസ് തയ്യാറാക്കിയിരുന്നത്. എട്ട് ജില്ലകളിലെ പൊലീസ് സംഘമാണ് ‘ഓപ്പറേഷൻ അമൃത്പാൽ സിംഗിൽ’ പങ്കാളികളായത്.

അമൃത്പാൽ സിംഗിന്റെ അറസ്റ്റിനു പിറകെ സംസ്ഥാനത്തെ ഇന്റർനെറ്റ് സേവനങ്ങൾ ഞായറാഴ്ച ഉച്ച വരെ നിർത്തിവച്ചു. വ്യാജപ്രചരണം തടയുന്നതിന്റെ ഭാഗമായാണ് ഈ നടപടി. ക്രമസമാധാനപാലനത്തിനായി പഞ്ചാബ് പൊലീസ് ജനങ്ങളോട് അഭ്യർത്ഥിച്ചിട്ടുണ്ട്. വ്യാജവാർത്തകൾ പ്രചരിപ്പിക്കരുതെന്നും പൊലീസ് നടപടികളിൽ ഇടപെടരുതെന്നും ജനങ്ങളോട് നിർദ്ദേശിക്കുകയുണ്ടായി.

ശനിയാഴ്ചയാണ് അമൃത്പാലിനെ അറസ്റ്റ് ചെയ്യാനുള്ള നീക്കങ്ങൾക്ക് പഞ്ചാബ് പൊലീസ് തുടക്കം കുറിച്ചത്. നേരത്തെ അമൃത്പാലിന്റെ ആറ് അനുയായികളെ അറസ്റ്റ് ചെയ്യുകയുണ്ടായി. അറസ്റ്റിനെ തുടർന്ന് പഞ്ചാബിലെ മോഗ ജില്ലയിൽ സുരക്ഷ കർശനമാക്കാൻ നിർദേശം നൽകി. അമൃത്പാലിന്റെ ജുല്ലുപൂർ ഖേര ഗ്രാമത്തിലും സുരക്ഷ ശക്തമാക്കി.

അമൃത്പാൽ സിംഗിന്റെ അനുയായി ലവ് പ്രീത് സിങ്ങിന്റെ അറസ്റ്റിനെ തുടർന്ന് പഞ്ചാബിൽ വൻ സംഘർഷത്തിന് കോപ്പു കൂട്ടിയിരുന്നു. അമൃത്പാലിന്റെ അനുയായികൾ അജ്‌നാല പൊലീസ് സ്‌റ്റേഷൻ ആക്രമിക്കുകയുണ്ടായി. സംഭവത്തിന് ശേഷം പഞ്ചാബ് സർക്കാറിനേയും കേന്ദ്രസർക്കാറിനേയും വെല്ലുവിളിച്ച് നിരവധി തവണ അമൃത്പാൽ സിംഗ് രംഗത്തെത്തിയിരുന്നതാണ്.