ക്ലാസിക്കൽ സിനിമകളുടെ നിർമാതാവ് അച്ചാണി രവി അന്തരിച്ചു

മലയാള സിനിമയെ ലോകസിനിമാ ഭൂപടത്തിൽ രേഖപ്പെടുത്തിയ നിർമ്മാതാവ് കെ. രവീന്ദ്രനാഥൻ നായർ അന്തരിച്ചു. 90 വയസായിരുന്നു. കൊല്ലത്തെ വസതിയിലായിരുന്നു അന്ത്യം. നിർമ്മിച്ച 14 സിനിമകൾക്ക് 18 ദേശീയ, സംസ്ഥാന പുരസ്‌കാരങ്ങൾ ലഭിച്ചിട്ടുണ്ട്.
കശുവണ്ടി വ്യവസായിയായിരുന്ന വെണ്ടർ കൃഷ്ണപിള്ളയുടെ എട്ടു മക്കളിൽ അഞ്ചാമനായാണ് കെ. രവീന്ദ്രനാഥൻ നായരുടെ ജനനം. ബിരുദ പഠനത്തിന് ശേഷം വ്യവസായത്തിലേക്ക് കടന്ന രവീന്ദ്രൻ നായരാണ് വിജയലക്ഷ്മി കാഷ്യൂ കമ്പനിയുടെ സ്ഥാപകൻ.

വ്യവസായം മാത്രമല്ല, കലയോടും അടങ്ങാത്ത താൽപര്യം സൂക്ഷിച്ചിരുന്ന അദ്ദേഹം 1967ൽ ആണ് സിനിമാ നിർമ്മാണത്തിന് ജനറൽ പിക്‌ചേഴ്‌സിന് രൂപം നൽകിയത്. ‘അച്ചാണി’ എന്ന സിനിമ ഹിറ്റായതോടെ അദ്ദേഹം സിനിമാലോകത്തെ ‘അച്ചാണി രവി’യായി.
അച്ചാണി, കാഞ്ചനസീത, കുമ്മാട്ടി, എലിപ്പത്തായം, മുഖാമുഖം, അനന്തരം, വിധേയൻ തുടങ്ങിയവ പ്രശസ്ത ചിത്രങ്ങളാണ്. നവതിക്ക് പിന്നാലെയാണ് മരണം. ജൂലൈ 6 ന് ആയിരുന്നു നവതി.

സ്കൂൾ വിദ്യാഭ്യാസം കൊല്ലം കന്റോൺമെന്റ് ബേസിക് ട്രെയിനിംഗ് സ്ക്കൂളിലും ഗവ. ബോയ്സ് ഹൈസ്ക്കൂളിലും പൂർത്തിയാക്കി. 1955 ൽ കോമേഴ്സ് ഐച്ഛിക വിഷയമായി ബിരുദം നേടിയ ശേഷം കശുവണ്ടി വ്യവസായരംഗത്ത് ശ്രദ്ധ കേന്ദ്രീകരിച്ചു. പിതാവിൻറെ മരണത്തോടെ ബിസിനസ് ഏറ്റെടുത്തു. അദ്ദേഹത്തിൻറെ വിജയലക്ഷ്മി കാഷ്യൂസ് കേരളത്തിലും പുറത്തും 115 ഫാക്ടറികളുളള വലിയ ബിസിനസ് ശൃംഖലയായി.

അച്ചാണിയുടെ ലാഭം ഉപയോഗിച്ച് കൊല്ലം പബ്ലിക് ലൈബ്രറിയും സോപാനം ഓഡിറ്റോറിയവും നിർമ്മിച്ചത് രവിയാണ്. ചിൽഡ്രൻസ് ലൈബ്രറിയും ആർട്ട് ഗ്യാലറിയും ഉൾപ്പെട്ട ഇത് ഇപ്പോൾ കൊല്ലത്തെ സാംസ്കാരിക കേന്ദ്രമാണ്. സിനിമയിലെ സമഗ്ര സംഭാവനയ്ക്ക് 2008-ൽ ജെ.സി.ഡാനിയേൽ പുരസ്കാരം നൽകി സർക്കാർ ആദരിച്ചു. ഗായികയായിരുന്ന ഭാര്യ ഉഷ രവി 2013-ൽ അന്തരിച്ചു. പ്രതാപ് നായർ, പ്രകാശ് നായർ, പ്രീത എന്നിവരാണ് മക്കൾ.