ശബരിമല തീർത്ഥാടകരുടെ വാഹനം മറിഞ്ഞപകടം, 13 പേർക്ക് പരിക്ക്, 2 പേർ ഗുരുതരാവസ്ഥയിൽ

പത്തനംതിട്ട : ശബരിമല തീർത്ഥാടകരുടെ ബസ് മറിഞ്ഞ് നിരവധി പേര്‍ക്ക് പരുക്ക്. നിലയ്ക്കലിൽ ഇന്ന് പുലർച്ചെയാണ് അപകടം ഉണ്ടായത്. ശബരിമല ദർശനം കഴിഞ്ഞ തീർത്ഥാടകരുമായി നിലയ്ക്കൽ നിന്ന് ഇറങ്ങിവന്ന മിനി ബസാണ് നിയന്ത്രണം വിട്ട് മറിഞ്ഞത്. അപകടത്തില്‍ തമിഴ്നാട്ടിൽ നിന്നുള്ള 13 തീർത്ഥാടകർക്ക് പരുക്കേറ്റു.

പരുക്കേറ്റവരെ കോട്ടയം മെഡിക്കൽ കോളജ് ആശുപത്രിയിലേക്ക് കൊണ്ടുപോയി. രണ്ട് പേരുടെ നില ഗുരുതരമാണെന്നാണ് വിവരം. അതേസമയം തിരുവനന്തപുരം ശ്രീകാര്യത്ത് ഡ്രെയ്നേജ് പെപ്പ്ലെെൻ നിർമാണത്തിനിടെ മണ്ണിടിഞ്ഞ് അപകടത്തിൽപ്പെട്ടവരെ രക്ഷിച്ചു. അയിരൂപ്പാറ സ്വദേശി വിനയൻ, ബിഹാർ സ്വദേശി ദീപക് എന്നിവരാണ് മണ്ണിനടിയിൽപ്പെട്ടത്. ഞായറാഴ്ച രാവിലെ 10 മണിക്കായിരുന്നു അപകടം.

15 അടിയോളം താഴ്ചയിലേക്കാണ് മണ്ണിടിഞ്ഞ് വീണത്. അ​ഗ്നിരക്ഷാസേനയുടേയും പോലീസിന്റെയും നാല് മണിക്കൂർ നേരത്തെ ശ്രമത്തിനൊടുവിലാണ് ഇവരെ പുറത്തെത്തിച്ചത്. വിനയനെ നേരത്തെ പുറത്തെടുക്കാൻ സാധിച്ചിരുന്നെങ്കിലും ദീപകിനെ രക്ഷിക്കാനായിരുന്നില്ല. പിന്നാലെ, 30-ഓളം അ​ഗ്നിരക്ഷാസേനാ ഉദ്യോ​ഗസ്ഥർ ചേർന്ന് നടത്തിയ രക്ഷാദൗത്യത്തിനൊടുവിലാണ് അദ്ദേഹത്തെ പുറത്തെത്തിച്ചത്.