കോവിഡ്: ഇന്ത്യയടക്കം 16 രാജ്യങ്ങളിലേക്ക് യാത്രാവിലക്ക് ഏര്‍പ്പെടുത്തി സൗദി അറേബ്യ

ജനറല്‍ ഡയറക്ടറേറ്റ് ഓഫ് പാസ്‌പോര്‍ട്ട് (General Directorate of Passports- (Jawazat)) ഇതു സംബന്ധിച്ച അറിയിപ്പ് പുറത്തിറക്കി. ഇന്ത്യ, ലെബനന്‍, സിറിയ, തുര്‍ക്കി, ഇറാന്‍, അഫ്ഗാനിസ്ഥാന്‍, യെമന്‍, സൊമാലിയ, എത്യോപ്യ, ഡെമോക്രാറ്റിക് റിപ്പബ്ലിക് ഓഫ് കോംഗോ, ലിബിയ, ഇന്തോനേഷ്യ, വിയറ്റ്നാം, അര്‍മേനിയ, ബെലാറസ്, വെനസ്വേല എന്നീ രാജ്യങ്ങളിലേക്കുള്ള യാത്രക്കാണ് വിലക്ക്. അറബ് ഇതര രാജ്യങ്ങളിലേക്ക് (non-Arab countries) യാത്ര ചെയ്യുന്നവരുടെ പാസ്‌പോര്‍ട്ടിന്റെ സാധുത ആറ് മാസത്തില്‍ കൂടുതലായിരിക്കണം എന്നും ജനറല്‍ ഡയറക്ടറേറ്റ് ഓഫ് പാസ്‌പോര്‍ട്ട് അറിയിച്ചു.

അറബ് രാജ്യങ്ങളിലേക്കുള്ള യാത്രയ്‌ക്ക് പാസ്‌പോര്‍ട്ടിന്റെ സാധുത മൂന്ന് മാസത്തില്‍ കൂടുതലായിരിക്കണം. ജിസിസി രാജ്യങ്ങളിലേക്ക് (Gulf Cooperation Council (GCC)) യാത്ര ചെയ്യുന്ന പൗരന്‍മാരുടെ ഐഡി കാര്‍ഡിന്റെ (national ID card) സാധുത മൂന്ന് മാസത്തില്‍ കൂടുതലായിരിക്കണം എന്നും ജനറല്‍ ഡയറക്ടറേറ്റ് ഓഫ് പാസ്‌പോര്‍ട്ട് അറിയിച്ചിട്ടുണ്ട്.

രേഖകളെ കൂടാതെ കോവിഡ് വാക്സിന്‍ സംബന്ധിച്ചുള്ള മാനദണ്ഡങ്ങളും യാത്രക്കാര്‍ പാലിക്കണം. താഴെപ്പറയുന്നവയാണ് അവ.

1. യാത്രക്കാര്‍ മൂന്ന് ഡോസ് കോവിഡ് -19 വാക്സിന്‍ എടുത്തിരിക്കണം. രണ്ടാമത്തെ ഡോസ് എടുത്ത് മൂന്ന് മാസത്തിന് ശേഷം ആയിരിക്കണം മൂന്നാമത്തെ ഡോസ് എടുക്കേണ്ടത്.

2. ഏതെങ്കിലും മെഡിക്കല്‍ കാരണങ്ങളാല്‍ വാക്സിന്‍ സ്വീകരിക്കാന്‍ സാധിക്കാത്തവര്‍ക്ക് ഇളവുകള്‍ ഉണ്ട്.

3. 16, 12 വയസ്സിന് താഴെയുള്ളവര്‍ രണ്ട് ഡോസ് വാക്സിന്‍ സ്വീകരിച്ചിരിക്കണം.

അതേസമയം, കോവിഡിനു പിന്നാലെ പല രാജ്യങ്ങളിലും കുരങ്ങുപനി (Monkeypox) പടര്‍ന്നു പിടിക്കുന്നതും ആശങ്കക്ക് ഇടയാക്കിയിരിക്കുകയാണ്. നിലവില്‍ യുകെ, സ്പെയിന്‍, പോര്‍ച്ചുഗല്‍ എന്നീ രാജ്യങ്ങളിലാണ് കുരങ്ങുപനി റിപ്പോര്‍ട്ട് ചെയ്തത്. പടിഞ്ഞാറന്‍, മധ്യ ആഫ്രിക്കയില്‍മാത്രം കണ്ട് വന്നിരുന്ന ഈ രോഗം യൂറോപ്പിലേക്കും വ്യാപിച്ചത് വളരെ ഗൗരവമായി കണക്കിലെടുക്കേണ്ട വിഷയമാണെന്ന് വിദഗ്ദര്‍ വിലയിരുത്തുന്നു. വളരെ അപൂര്‍വമായി മാത്രമാണ് ഈ രോഗം ആഫ്രിക്കയ്ക്ക് പുറത്ത് റിപ്പോര്‍ട്ട് ചെയ്തിട്ടുള്ളത്. മൃഗങ്ങളില്‍ നിന്നാണ് രോഗം മനുഷ്യരിലേക്ക് പകരുന്നത്. മനുഷ്യരില്‍ നിന്ന് മനുഷ്യരിലേക്ക് വളരെ അടുത്ത ബന്ധത്തിലൂടെയും രോഗം പകരും.

ഇപ്പോള്‍ രോഗം പകരുന്ന രീതി എങ്ങനെയെന്ന് കണ്ടെത്താന്‍ സാധിച്ചിട്ടില്ല. യുകെയില്‍ മെയ് 18 വരെ 9 കേസുകളാണ് റിപ്പോര്‍ട്ട് ചെയ്തിട്ടുള്ളത്. ഇവരാരും തമ്മില്‍ പരസ്പരം യാതൊരു ബന്ധവുമില്ല. മെയ് ആറിന് ആദ്യമായി രോഗം വന്നയാള്‍ നൈജീരിയ സന്ദര്‍ശിച്ചിരുന്നു. കേസുകള്‍ റിപ്പോര്‍ട്ട് ചെയ്യപ്പെടാതെ പോയിട്ടുണ്ടാവുമെന്നും ഇത് ഗുരുതരമായ പ്രതിസന്ധിയിലേക്ക് നയിക്കുമെന്നും വിദഗ്ദര്‍ മുന്നറിയിപ്പ് നല്‍കുന്നുണ്ട്. കോവിഡ് നിയന്ത്രണങ്ങള്‍ എടുത്ത് മാറ്റിയതിന് ശേഷം ലോകത്തിന്‍െറ എല്ലാ ഭാഗങ്ങളിലേക്കുമുള്ള സഞ്ചാരം കൂടിയതോടെയാവും രോഗം വ്യാപിച്ചതെന്നാണ് നിഗമനം. വസൂരി വിഭാഗത്തില്‍ പെടുന്നതാണ് കുരങ്ങുപനിയെന്നത് ആരോഗ്യരംഗത്തെ ആശങ്ക വര്‍ധിപ്പിക്കുന്നുണ്ട്.