പുനര്‍വിവാഹം ചെയ്ത യുവതിക്ക് ക്രൂര മര്‍ദനം; ആദ്യഭര്‍ത്താവിന്റെ വീട്ടുകാർക്കെതിരെ കേസ്

അഹമ്മദാബാദ്: പുനര്‍വിവാഹം ചെയ്ത യുവതിയെ കെട്ടിയിട്ട് ക്രൂര മർദ്ദനത്തിന് ഇരയാക്കി. മരിച്ചുപോയ ആദ്യഭര്‍ത്താവിന്റെ വീട്ടുകാരാണ് യുവതിയെ കെട്ടിയിട്ട് മര്‍ദിക്കുകയും അവരുടെ മുടിമുറിക്കുകയും ചെയ്തത്. അമ്രേലി ജില്ലയിലെ ഗല്‍കോടഡി ഗ്രാമത്തില്‍ തിങ്കളാഴ്ചയാണ് സംഭവം. മുപ്പത്തഞ്ചുകാരിയായ യുവതിക്കാണ് മർദ്ദനമേറ്റത്. യുവതി ആശുപത്രിയിൽ ചികിത്സയിലാണ്.

സംഭവത്തില്‍ നാലു പേര്‍ക്കെതിരേ കേസെടുത്ത പോലീസ് രണ്ടുപേരെ അറസ്റ്റുചെയ്തു. ആദ്യ വിവാഹബന്ധത്തില്‍ യുവതിക്ക് നാലുമക്കളുണ്ട്. നാലുവര്‍ഷം മുമ്പ് ഭര്‍ത്താവ് വാഹനാപകടത്തില്‍ മരിച്ചു. തുടര്‍ന്ന് കുട്ടികളുമായി കഴിഞ്ഞിരുന്ന യുവതി ഒരുവര്‍ഷംമുമ്പ് മറ്റൊരാളെ വിവാഹംചെയ്തു. പഴയഭര്‍ത്താവിന്റെ സഹോദരി ഗൂഗയെ കാണാന്‍ ചെന്നപ്പോഴാണ് യുവതിയെ ആക്രമിച്ചത്.

ഗൂഗയും അയല്‍വാസിയായ ഫാഗു ബെന്നും ചേര്‍ന്ന് യുവതിയുടെ ഇരുകൈകളും തൂണില്‍ പിടിച്ചുവെച്ചു. ഗൂഗയുടെ ഭര്‍ത്താവ് ഒരു മരത്തടികൊണ്ട് യുവതിയുടെ ബോധം പോകുവോളം തല്ലി. വീണ്ടും വിവാഹം ചെയ്തതിലുള്ള ദേഷ്യം തീര്‍ക്കാനായിരുന്നു ആക്രമണം. മറ്റൊരു ബന്ധുവായ ചാക്കു യുവതിയുടെ മുടിയും മുറിച്ചു. പഴയഭര്‍ത്താവിന്റെ അമ്മയാണ് സ്ഥലത്തെത്തി കൂടുതല്‍ അക്രമം നടത്തുന്നത് തടഞ്ഞു.