കലിംഗ സർവകലാശാലയുടെ വ്യാജ ബിരുദം, നിഖിലിനെ സഹായിച്ചത് എസ് എഫ് ഐയുടെ മുൻനേതാവ്, മൊഴി ഇങ്ങനെ

ആലപ്പുഴ: നിഖിൽ തോമസിന് കലിംഗ സർവകലാശാലയുടെ വ്യാജ ബിരുദ സർട്ടിഫിക്കറ്റുണ്ടാക്കാൻ സഹായിച്ചത് എസ് എഫ് ഐ മുൻ നേതാവെന്ന് നിഖിലിന്റെ സുഹൃത്തിന്റെ മൊഴി. കേസുമായി ബന്ധപ്പെട്ട് നിഖിലിന്റെ അടുത്ത സുഹൃത്തുക്കളെ കായംകുളം പൊലീസ് ചോദ്യം ചെയ്തിരുന്നു. അതിലൊരാളാണ് ഇത്തരമൊരു നിർണായക മൊഴി പൊലീസിന് നൽകിയത്. കൊച്ചി കേന്ദ്രീകരിച്ചുള്ള ഒരു ഏജൻസി വഴിയായിരുന്നു വ്യാജ സർട്ടിഫിക്കറ്റ് നിർമ്മിച്ചതെന്നും സുഹൃത്തിന്റെ മൊഴിയിലുണ്ട്.

നിഖിലിനെ പിടികൂടി ചോദ്യംചെയ്താൽ മാത്രമേ ഇക്കാര്യങ്ങളിലും വ്യക്തത വരുത്താനാകു. നിഖിൽ സമർപ്പിച്ച ബിരുദ സർട്ടിഫിക്കറ്റും ടി.സിയും മൈഗ്രേഷൻ സർട്ടിഫിക്കറ്റും വ്യാജമാണ്. കേരള സർവകലാശാലയുടെ ഇക്വലൻസി സർട്ടിഫിക്കറ്റ് ഒറിജിനലാണോയെന്നും ഇനി അന്വേഷിക്കേണ്ടി വരും. ഞായറാഴ്ച വരെ കായംകുളത്തെ വീട്ടിലുണ്ടായിരുന്ന നിഖിൽ തോമസ് തിങ്കളാഴ്ച പുലർച്ചെ എസ്.എഫ്.ഐ സംസ്ഥാന നേതാവ് പി.എം.ആർഷോയെ കാണാൻ തിരുവനന്തപുരത്ത് പോയതിന് പിന്നാലെയാണ് കാണാതായത്.

നിഖിലിനെ പിടികൂടാനുള്ള ശ്രമത്തിലാണ് അന്വേഷണസംഘവും. ആലപ്പുഴ, കൊല്ലം, തിരുവനന്തപുരം ജില്ലകൾ കേന്ദ്രീകരിച്ചാണ് അന്വേഷണം പുരോഗമിക്കുന്നത്. നിഖിലിന്റെ ഫോൺ സ്വിച്ച് ഓഫാണ്. ഫോൺ സൈബർ പൊലീസ് നിരീക്ഷിക്കുന്നുണ്ട്. നിഖിലിന്റെ എം.കോം പ്രവേശനം കേരള സർവകലാശാല വിസി കഴിഞ്ഞ ദിവസം റദ്ദാക്കിയിരുന്നു.