അരുൺ കെട്ടിയിട്ട് പീഡിപ്പിച്ചു, നാല് ലക്ഷം രൂപയുടെ ചിട്ടിയിൽ ചേർത്തിട്ട് പണം തന്നില്ല, ഷീബയുടെ മൊഴിയിങ്ങനെ

അടിമാലിയിൽ പ്രണയത്തിൽ നിന്നും പിന്മാറിയെന്ന് ആരോപിച്ച് യുവാവിന്റെ മുഖത്ത് ആസിഡ് ഒഴിച്ചതിന് അറസ്റ്റിലായ ഷീബ ‌നൽകിയത് ഞെട്ടിക്കുന്ന മൊഴി, ക്രൂരതയ്ക്ക് തന്നെ പ്രേരിപ്പിച്ചത് ചിട്ടിപ്പണം നൽകാത്തതിലും പണം നൽകാമെന്ന് വിശ്വസിപ്പിച്ച് വിളിച്ചു വരുത്തി കെട്ടിയിയിട്ട് പീഡിപ്പിച്ചതിലുമുള്ള വൈരാഗ്യമെന്ന് ഷീബ പോലിസിനോട് പറഞ്ഞു.

നാലു ലക്ഷം രൂപയുടെ ചിട്ടിക്ക് അരുൺ ചേർന്നിരുന്നു, ഇത് വട്ടമെത്തിയിട്ടും നൽകിയില്ല. ഈ തുക ചോദിച്ച് അരുണിനെ പലതവണ വിളിച്ചിരുന്നു, ഒരു ദിവസം പണം നൽകാമെന്ന് അറിയിച്ചതിനെ തുടർന്ന് ഇയാൾ നിർദ്ദേശിച്ച സ്ഥലത്ത് താൻ എത്തിയപ്പോൾ കെട്ടിയിട്ട് മർദ്ദിച്ചെന്നും ഷീബ പറയുന്നു. വിഷയത്തിൽ കൂടുതൽ അന്വേഷണം വേണമെന്ന് പോലിസ് പറഞ്ഞു. 14000 രൂപ താൻ ഷീബയിൽ നിന്നും കൈപ്പറ്റിയിരുന്നതായി അരുൺ സമ്മതിച്ചതായുള്ള വിവരവും പുറത്തുവരുന്നുണ്ട്.

ചൊവ്വാഴ്ച രാവിലെ പത്ത് മണിയോടെയാണ് സംഭവമുണ്ടായത്. അടിമാലി ഇരുമ്പുപാലം കത്തോലിക്കാ പള്ളിയുടെ മുന്നിൽ നിന്നും സംസാരിക്കവെ ഷീബ കൈയ്യിൽ കരുതിയിരുന്ന ആസിഡ് തിരുവനന്തപുരം പൂജപ്പുര സ്വദേശി അരുൺ കുമാറിന്റെ മുഖത്ത് ഒഴിക്കുകയായിരുന്നു. രണ്ട് വർഷം മുമ്പ് ഫേസ്ബുക്കിലൂടെയാണ് അരുണും ഷീബയും പരിചയത്തിലാകുന്നത്. പരിചയം പിന്നീട് പ്രണയത്തിലേക്ക് വഴിമാറി. ഒരു വർഷം തിരുവനന്തപുരത്ത് ഹോം നഴ്‌സായി ഷീബ ജോലി ചെയ്തിരുന്നു. ഈ കാലഘട്ടത്തിൽ ബന്ധം ശക്തമായി. ഷീബയെ വിവാഹം ചെയ്യാമെന്ന് അരുൺ ഉറപ്പ് നൽകി.

എന്നാൽ പിന്നീടാണ് ഷീബ വിവാഹിതയും രണ്ട് കുട്ടികളുടെ അമ്മയുമാണെന്ന് അരുൺ അറിയുന്നത്. ഇതോടെ അരുൺ ബന്ധത്തിൽ നിന്നും പിന്മാറി. മാത്രമല്ല മറ്റൊരു വിവാഹത്തിന് അരുൺ ഒരുങ്ങുകയും ചെയ്തു. ഇതറിഞ്ഞ് ഷീബ അരുണിനെ അടിമാലിയിലേക്ക് വിളിച്ചു വരുത്തി. സംസാരിക്കുന്നതിനിടെ ആക്രമിക്കുകയായിരുന്നു. പണം നൽകിയാൽ പ്രശ്‌നം അവസാനിപ്പിക്കാമെന്ന് തെറ്റിധരിപ്പിച്ചാണ് അരുണിനെ ഷീബ വിളിച്ചു വരുത്തിയത്.

വരുന്നത് ഒറ്റക്ക് ആയിരിക്കണമെന്ന് ഷീബ അരുണിനോട് പറഞ്ഞിരുന്നു. ഇതോടെ സംഭവം മറ്റാരും അറിയില്ലെന്നായിരുന്നു ഷീബ കരുതിയത്. എന്നാൽ സുഹൃത്തുക്കൾക്ക് ഒപ്പമാണ് അരുൺ അടിമാലിയിൽ എത്തിയത്. പരുക്കേറ്റതോടെ പരിഭ്രമിച്ച അരുണും സുഹൃത്തുക്കളും വളരെ പെട്ടെന്ന് അവിടെനിന്നും മടങ്ങി. അങ്കമാലിയിലെ സ്വകാര്യ ആശുപത്രിയൽ പ്രാഥമിക ചികിത്സ തേടി. തുടർന്ന് തിരുവനന്തപുരം മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. തുടർന്ന് പോലീസിൽ പരാതി നൽകി. പരാതിയുടെ അടിസ്ഥാനത്തിൽ അടിമാലി പോലീസ് തിരുവനന്തപുരത്ത് എത്തി അരുണിന്റെ മൊഴിയെടുത്തു. തുടർന്ന് പള്ളിയിൽ നിന്നുമുള്ള സിസി ടിവി ദൃശ്യങ്ങളും ശേഖരിച്ചു. പിന്നീടാണ് ഭർതൃവീട്ടിൽ എത്തി ഷീബയെ പോലീസ് അറസ്റ്റ് ചെയ്യുന്നത്.