സിദ്ധാർത്ഥിൻ്റെ കൊലപാതകം, കേന്ദ്ര ഏജൻസി അന്വേഷിക്കണം- ഹിന്ദു ഐക്യവേദി

തിരുവനന്തപുരം : പൂക്കോട് വെറ്ററിനറി സർവകലാശാലയിലെ വിദ്യാർത്ഥി സിദ്ധാർത്ഥിനെ റാഗിംഗിന് ഇരയാക്കി ക്രൂരമായി കൊല ചെയ്ത സംഭവത്തിൽ കേന്ദ്ര ഏജൻസി അന്വേഷിക്കണമെന്ന് ഹിന്ദു ഐക്യവേദി സംസ്ഥാന വക്താവ് ഈസ് ബിജു. സംസ്ഥാന സർക്കാരും,സർക്കാർ അനുകൂല സർവ്വകലാശാല അധികൃതരും കേസന്വേഷണം അട്ടിമറിക്കാനും, കുറ്റവാളികളായ എസ്എഫ്ഐ വിദ്യാർത്ഥികളെയും, നേതാക്കളെയും രക്ഷപ്പെടുത്താനും ശ്രമങ്ങൾ തകൃതിയായി നടക്കുന്നു എന്നതിനാലാണ് ഹിന്ദു ഐക്യവേദിഈ ആവശ്യമുന്നയിക്കുന്നത്.

ഇത്തരം സംഭവങ്ങൾ കേരളത്തിലെ കലാലയങ്ങളിൽഒരു വിദ്യാർത്ഥികൾക്കും സംഭവിച്ചുകൂടാത്തതാണ്. ഇരുപത്തൊന്നുകാരനായ ഒരു വിദ്യാർത്ഥിയെ സഹപാഠികൾ വിചാരണ ചെയ്ത് തല്ലിക്കൊന്ന് കെട്ടിത്തൂക്കിയെന്ന ഭീതിജനകമായ വാർത്ത പുറത്ത് വന്നിട്ട് നാളുകൾ കഴിയുമ്പോഴും കേരളംപുലർത്തുന്ന നിസംഗത സാംസ്കാരിക കേരളത്തിന് അപമാനമാണെന്ന് ഈ. എസ്. ബിജു പറഞ്ഞു.

കലാസപര്യയുടേയും ജ്ഞാനാന്വേഷണത്തിൻ്റെയും ആലയങ്ങളാകേണ്ട വിദ്യാഭ്യാസകേന്ദ്രങ്ങൾ അരാജകത്വത്തിൻ്റെയും അക്രമത്തിൻ്റെയും വിളനിലമാക്കുന്നതിൽ ഭരണപക്ഷ വിദ്യാർഥി പ്രസ്ഥാനം തന്നെ നേതൃത്വം കൊടുക്കുന്നതും, ജനാധിപത്യ കേരളത്തിന് ഭൂഷണമല്ല. അങ്ങേയറ്റം നിഷ്ക്രിയമായിപ്പോയ സാമൂഹിക സാംസ്കാരിക രംഗത്ത് തിരുത്തൽ അനിവാര്യമാണ്. പൊതുസമൂഹം ഇത്തരം അരാജക പ്രവണതകൾക്കെതിരെ ശക്തമായി ഇടപെടണംഎന്നും ഈ. എസ്. ബിജു ആവശ്യപ്പെട്ടു.