അമ്മ മരിച്ച ദുഖം താങ്ങാനാവാതെ മകന്‍ ജീവനൊടുക്കി

ചാത്തന്നൂര്‍: അമ്മ മരിച്ചതിന്റെ ദുഖം താങ്ങാനാവാതെ മകന്‍ പാലത്തില്‍ നിന്നും ആറ്റിലേക്ക് ചാടി ജീവനൊടുക്കി. ചാത്തന്നൂര്‍ കോയിപ്പാട് തണ്ടാന്റഴികത്ത് വീട്ടില്‍ രാജശേഖരന്‍ ഉണ്ണിത്താന്റെ മകന്‍ 27കാരന്‍ ശ്രീരാഗാണ് മരിച്ചത്. ഇന്നലെ ഉച്ചയോടെയാണ് സംഭവം. കുമ്മല്ലൂര്‍ പാലത്തില്‍ നിന്നും ഇത്തിക്കരയാറ്റിലേക്ക് ശ്രീരാഗ് ചാടുകയായിരുന്നു.

ശ്രീരാഗിന്റെ അമ്മ സുധര്‍മണി(52) കഴിഞ്ഞ 12-ാം തീയതിയാണ് മരിച്ചത്. ആന്ധ്രപ്രദേശില്‍ കശുവണ്ടി മേഖലയില്‍ ജോലി ചെയ്തിരുന്ന ശ്രീരാഗ് അമ്മയുടെ മരണ വിവരം അറിഞ്ഞാണ് നാട്ടില്‍ എത്തിയത്. വെള്ളിയാഴ്ച സുധര്‍മണയുടെ സംസ്‌കാരം വീട്ടു വളപ്പില്‍ നടത്തി. ഇന്ന് സഞ്ചയനമായിരുന്നു.

അമ്മയുടെ മരണ വാര്‍ത്ത അറിഞ്ഞത് മുതല്‍ ശ്രീരാഗ് ഏറെ തകര്‍ന്ന് പോയിരുന്നു. ഏത് സമയവും ദുഖിതനായാണ് യുവാവ് നടന്നിരുന്നത്. പലരും സമാധാന വാക്കുകള്‍ പറഞ്ഞെങ്കിലും അതൊന്നും ശ്രീരാഗിന്റെ ഉള്ളിലെ ദുഖം ശമിപ്പിക്കാനാവുന്നത് ആയിരുന്നില്ല. ഇന്നലെ ഉച്ചയോടെ വീട്ടില്‍ നിന്നും കുമ്മല്ലൂര്‍ പാലത്തില്‍ എത്തിയ ശ്രീരാഗ് ആറ്റിലേക്ക് ചാടുകയായിരുന്നു.

ആറ്റിലേക്ക് എന്തോ വീഴുന്ന ശബ്ദം കേട്ട് കുറച്ചകലെ കക്ക വാരുന്ന ആള്‍ നോക്കിയപ്പോള്‍ യുവാവ് വെള്ളത്തിന് മുകളിലേക്ക് പൊങ്ങിയ ശേഷം വീണ്ടും താഴുന്നതാണ് കണ്ടത്. തുടര്‍ന്ന് വിവരം അറിഞ്ഞ് എത്തിയ അഗ്നി രക്ഷാ സേനയും ബന്ധുക്കളും തിരച്ചില്‍ നടത്തി. പരവൂര്‍ അഗ്‌നിരക്ഷാസേനയുടെ സ്‌കൂബ സംഘം എത്തിയപ്പോഴേക്കും ആറ്റില്‍ നിന്നു ശ്രീരാഗിനെ കണ്ടെത്തിയിരുന്നു. ഉടന്‍ ആശുപത്രിയില്‍ എത്തിച്ചെങ്കിലും മരിച്ചിരുന്നു. മൃതശരീരം ഗവ. മെഡിക്കല്‍ കോളജ് ആശുപത്രി മോര്‍ച്ചറിയില്‍. സഹോദരി രാഖി.