ഒറ്റപ്പെട്ട സംഭവങ്ങളെ പര്‍വതീകരിച്ച് കാണിക്കുന്നു, ആഭ്യന്തര വകുപ്പ് ഗൂഢസംഘത്തിന്റെ കയ്യിലല്ലെന്ന് മുഖ്യമന്ത്രി

തിരുവനന്തപുരം. ജനങ്ങളുടെ ജീവനും സ്വത്തിനും ഹാനികരമായ അന്തരീക്ഷം കേരളത്തിലില്ലെന്ന് മുഖ്യമന്ത്രി പിണറായി വിജയന്‍. സംസ്ഥാവത്ത് കുറ്റകൃത്യങ്ങള്‍ നടത്തുന്നവരെ അടിച്ചമര്‍ത്തും. എന്നാല്‍ ചില ഒറ്റപ്പെട്ട സംഭവങ്ങള്‍ പര്‍വ്വതീകരിക്കരുതെന്നും മുഖ്യമന്ത്രി പിണറായി വിജയുന്‍ പറഞ്ഞു. ആലുവയില്‍ നടന്നത് ദൗര്‍ഭാഗ്യകരമായ സംഭവമാണ് അത് ഇനി ആവര്‍ത്തിക്കപ്പെടാന്‍ പാടില്ലെന്നും അദ്ദേഹം പറഞ്ഞു.

ആഭ്യന്തരവകുപ്പ് ഗൂഢ സംഘത്തിന്റെ കൈയിലാണെന്നത് പ്രത്യേക മാനസികാവസ്ഥയുടെ ഭാഗമായി പറയുന്നതാണെന്ന് അദ്ദേഹം പറഞ്ഞു. ആഭ്യന്തരവകുപ്പ് ഒരു ഗൂഢസംഘത്തിന്റെയും കൈയിലല്ല. അഭിമാനത്തോടെ ശരിയായ രീതിയിലാണ് കാര്യങ്ങള്‍ നിര്‍വഹിക്കുന്നതെന്ന് പറയാന്‍ സാധിക്കുമെന്നും മുഖ്യമന്ത്രി പറഞ്ഞു.

വകുപ്പിന്റെ പ്രവര്‍ത്തനം പരിശോധിച്ചാല്‍ അഭിമാനം ഉണ്ടാകുന്ന പ്രവര്‍ത്തനങ്ങളാണ് നടന്നിരിക്കുന്നത്. ചില ഒറ്റപ്പെട്ട സംഭവങ്ങളെ പര്‍വതീകരിച്ച് കേരളത്തില്‍ ആകെ ഉണ്ടാകുന്നത് എന്ന നില ഉണ്ടാക്കേണ്ടതില്ലെന്നും മുഖ്യമന്ത്രി പറഞ്ഞു. എന്ത് അടിസ്ഥാനത്തിലാണ് ആഭ്യന്തരവകുപ്പിനെ നിയന്ത്രിക്കുന്നത് ഗൂഢസംഘമാണെന്ന് ആരോപിക്കുന്നതെന്നും മുഖ്യമന്ത്രി പിണറായി വിജയന്‍ ചോദിച്ചു.