കര്‍ണാടക സര്‍ക്കാര്‍ നടപടിയില്‍ ഇടപെടില്ലെന്ന് സുപ്രീംകോടതി, മഅദനിയുടെ ആവശ്യം തള്ളി

ന്യൂഡല്‍ഹി. ജ്യാമത്തില്‍ ഇളവ് ലഭിച്ച് കേരളത്തിലേക്ക് പോകുന്നതിനുള്ള സുരക്ഷ ചെലവ് കുറയ്ക്കണമെന്ന മഅദനിയുടെ ആവശ്യം സുപ്രീംകോടതി തള്ളി. കര്‍ണാടക സര്‍ക്കാരിന്റെ നടപടിയില്‍ ഇടപെടുവാന്‍ സാധിക്കില്ലെന്ന് സുപ്രീംകോടതി അറിയിച്ചു. പോലീസ് അകമ്പടിയുടെ ചെലവായി മാസം 20 ലക്ഷം കെട്ടിവയ്ക്കണമെന്നായിരുന്നു കര്‍ണാടക പോലീസിന്റെ ആവശ്യം.

തുക കുറയ്ക്കുവാന്‍ സാധിക്കില്ലെന്നും കര്‍ണാടക പോലീസ് സുപ്രീംകോടതിയെ അറിയിച്ചു. ജൂലൈ എട്ട് വരെയുള്ള സുരക്ഷ കാര്യങ്ങള്‍ക്ക് 54.63 ലക്ഷം രൂപ കെട്ടിവയ്ക്കണമെന്നാണ് ആവശ്യപ്പെട്ടിരിക്കുന്നത്. അതേസമയം സുരക്ഷാഭീഷണി, റിസ്‌ക് അസസ്‌മെന്റ് എന്നിവയുടെ അടിസ്ഥാനത്തിലാണ് സുരക്ഷാ ഉദ്യോഗസ്ഥരെ തീരുമാനിച്ചിരിക്കുന്നതെന്ന് സത്യവാങ്മൂലത്തില്‍ പറയുന്നു. ഇതിനെക്കുറിച്ച് റിപ്പോര്‍ട്ട് തയ്യാറാക്കുവാന്‍ ഡിസിപി യതീഷ് ചന്ദ്രയെ നിയോഗിച്ചിരുന്നു.

അവര്‍ കേരളത്തിലെ വിവിധ സ്ഥലങ്ങളിലെത്തി പരിശോധിച്ചു നല്‍കിയ റിപ്പോര്‍ട്ടിന്റെ അടിസ്ഥാനത്തിലാണു തുക തീരുമാനിച്ചത്. കോടതി ഉത്തരവ് അനുസരിക്കാതിരുന്നിട്ടില്ലെന്നും സത്യവാങ്മൂലത്തില്‍ ചൂണ്ടിക്കാട്ടി. ജാമ്യ ഇളവു നല്‍കിയ തങ്ങളുടെ ഉത്തരവു മറികടക്കാനാണോ ഈ രീതിയെന്നു നേരത്തേ മഅദനിയുടെ അപേക്ഷ പരിഗണിക്കുമ്പോള്‍ കോടതി ചോദിച്ചിരുന്നു. മഅദനിക്കുള്ള സുരക്ഷയ്ക്ക്, 54.63 ലക്ഷം രൂപ കെട്ടിവയ്ക്കണമെന്നാണു കര്‍ണാടക പോലീസ് ആവശ്യപ്പെട്ടത്.