ഇരിട്ടിയുടെ മരുമകളും എന്‍ഡിഎ സ്ഥാനാര്‍ത്ഥിയുമായ അസം സ്വദേശിനി മുണ്മിക്ക് സുരേഷ് ഗോപിയുടെ വക വീട്

കണ്ണൂര്‍: തദ്ദേശ തെരഞ്ഞെടുപ്പില്‍ ഇരിട്ടി നഗരസഭയിലെ 11-ാം വാര്‍ഡ് വികാസ് നഗറില്‍ നിന്നും മത്സരിക്കാന്‍ ഒരു അസം സ്വേശിനിയുമുണ്ട്. വാര്‍ഡിലെ എന്‍ഡിഎ സ്ഥാനാര്‍ത്ഥിയാണ് അസം സ്വദേശിനിയായ മുണ്മി ഷാജി. ഇപ്പോള്‍ സ്ഥാനാര്‍ത്ഥി ആയതിന് പിന്നാലെ മുണ്മിക്ക് വീടും ഒരുങ്ങുകയാണ്. സുരേഷ് ഗോപി എംപിയാണ് ഇവര്‍ക്ക് വീട് സമ്മാനിച്ചത്.

തിരഞ്ഞെടുപ്പ് ഫലം വരുന്നതിന് മുമ്പ് തന്നെ മുണ്മി ഡബിള് ഹാപ്പി ആയിരിക്കുകയാണ്. സുരേഷ് ഗോപി മുണ്മിയെ വിളിച്ചു. എന്നാല്‍ വിളിച്ച് വെറുതെ കുശലം പറയുകയായിരുന്നില്ല സുരേഷ് ഗോപി ചെയ്തത്. മറിച്ച് മുണ്മിക്ക് ഒരു വീട് സമ്മാനിക്കുന്നതിനെ കുറിച്ചായിരുന്നു സുരേഷ് ഗോപി പറഞ്ഞത്. ഇതോടെ മുണ്മി സുരേഷ് ഗോപിയോട് തന്റെ നന്ദി അറിയിക്കുകയും ചെയ്തു. ‘സുരേഷ് ഗോപി സാറിന് എന്റെ നന്ദിയുണ്ട്. വളരെ സന്തോഷമുണ്ട്, മറ്റൊന്നും പറയാനില്ല.’ അസം സ്വദേശി ആണെങ്കിലും മലയാളം നന്നായി അറിയാവുന്ന മുണ്മി പറഞ്ഞു.

മുണ്മിയുടെ സ്ഥാനാര്‍ത്ഥിത്വം ഏറെ കൗതുകകരമായിരുന്നു. ഇരിട്ടി നഗരസഭയിലേക്ക് അസമില്‍ നിന്നും ഒരു സ്ഥാനാര്‍ത്ഥി എന്നതായിരുന്നു ഏറെ കൗതുകരമായത്. എന്നാല്‍ അനായാസമായി മലയാളം പറഞ്ഞ് വോട്ടര്‍മാരുടെ മനം കവരുകയാണ് മുണ്മി. എട്ട് വര്‍ഷങ്ങള്‍ക്ക് മുമ്പാണ് ഷാജിയുമായുള്ള പ്രണയ വിവാഹത്തെ തുടര്‍ന്ന് മുണ്മി ഇരിട്ടിയില്‍ എത്തിയത്. ദമ്പതികള്‍ക്ക് രണ്ട് പെണ്‍മക്കളുണ്ട്. മുണ്മിയെ കുറിച്ചുള്ള വാര്‍ത്ത ശ്രദ്ധയില്‍ പെട്ടതോടെയാണ് സുരേഷ് ഗോപി ഇവര്‍ക്ക് വീട് വെച്ച് നല്‍കാന്‍ മുന്നോട്ട് വന്നത്.