സ്ഡിനിയിൽ പള്ളിയിൽ ബിഷപ്പിന് നേരെയുണ്ടായ ആക്രമണം, ഭീകരാക്രമണമെന്ന് സ്ഥിരീകരണം

കാൻബെറ: ഓസ്ട്രേലിയയിൽ പള്ളിയിൽ ബിഷപ്പിന് നേരെയുണ്ടായ ആക്രമണം ഭീകരാക്രമണമെന്ന് സ്ഥിരീകരിച്ചു. അസീറിയൻ ക്രൈസ്റ്റ് ദി ഗുഡ് ഷെപ്പേർഡ് പള്ളിയിൽ കുർബാനയ്ക്കിടെ ബിഷപ്പിനെയും പുരോഹിതനെയും പള്ളിയിൽ പോയവരെയും ആക്രമിച്ചതിനെ തുടർന്ന് 16 വയസ്സുള്ള ഒരു ആൺകുട്ടി അറസ്റ്റിലായിരുന്നു .

നാല് പേർക്ക് “ജീവന് ഭീഷണിയില്ലാത്ത” പരിക്കുകൾ ഉണ്ടായിട്ടുണ്ടെന്ന് പോലീസ് പറയുന്നു. അക്രമിക്കും പരിക്കേറ്റു. മതതീവ്രവാദ ആക്രമമാണ് ഇതെന്നാണ് ഓസ്‌ട്രേലിയൻ പോലീസ് പറയുന്നത്. അന്വേഷണം തുടരുകയാണ്. പള്ളിയിൽ ഒത്തുകൂടിയ വിശ്വാസികൾക്ക് മുൻപിൽ പ്രസം​ഗിക്കുകയായിരുന്ന ബിഷപ്പിനടുത്തെത്തിയ യുവാവ് കത്തി ഉപയോ​ഗിച്ച് നിരവധി തവണ കുത്തുകയുമായിരുന്നു. ബിഷപ്പിന്റെ മുഖത്തും കഴുത്തിലും പരിക്കേറ്റു.

ഇതിന്റെ വീഡിയോ ദൃശ്യങ്ങളും പുറത്തുവന്നിട്ടുണ്ട്. ഓസ്ട്രേലിയയിലെ തന്നെ ഏറ്റവും പ്രസിദ്ധരായ ബിഷപ്പുമാരിൽ ഒരാളാണ് ആക്രമണത്തിന് ഇരയായ മാർ മാറി ഇമ്മാനുവൽ. ടിക്ടോക്കിലും മറ്റ് സമൂഹ മാദ്ധ്യമ പ്ലാറ്റ് ഫോമുകളിലും വൈറലായ താരം കൂടിയാണ് ഇദ്ദേഹം.

സിഡ്നിയിൽ കഴിഞ്ഞ ദിവസം മറ്റൊരു ആക്രമണം നടന്നിരുന്നു. ഷോപ്പിം​ഗ് മാളിലെത്തിയ അക്രമി സാധാരണക്കാരെ കുത്തിവീഴ്‌ത്തുകയായിരുന്നു. സംഭവത്തിൽ ആറ് പേർ കൊല്ലപ്പെട്ടു. അക്രമിയെ പോലീസ് വെടിവച്ച് വീഴ്‌ത്തുകയും ചെയ്തു. ആക്രമണത്തിനുള്ള കാരണം ഇതുവരെയും കണ്ടെത്താനായിട്ടില്ല.