മറ്റ് പാര്‍ട്ടികളിലെ നേതാക്കളോട് സംസാരിച്ചാല്‍ ഡിഎന്‍എ മാറില്ല- ഗുലാം നബി ആസാദ്

ന്യൂഡല്‍ഹി. മറ്റ് പാര്‍ട്ടികളിലെ നേതാക്കളെ കണ്ടുവെന്നോ സംസാരിച്ചുവെന്നോവച്ച് ഒരാളുടെ ഡിഎന്‍എ മാറില്ലെന്ന് ഗുലാം നബി ആസാദ്. പ്രധാനമന്ത്രി നരേന്ദ്രമോദിയുമായി അടുപ്പമുണ്ടെന്ന കോണ്‍ഗ്രസിന്റെ ആരോപണത്തിന് മറുപടിയായിട്ടാണ് അദ്ദേഹത്തിന്റെ പ്രസ്താവന. ആസാദിന്റെ ഡിഎന്‍എ മോദി ഫൈ ചെയ്യപ്പെട്ടുവെന്നായിരുന്നു കോണ്‍ഗ്രസിന്റെ ആരോപണം.

രാജ്യസഭയില്‍ നിന്നും ഗുലാം നബി ആസാദ് വിരമിക്കുന്ന സമയത്ത് പ്രധാനമന്ത്രി നടത്തിയ പ്രസംഗം ഉയര്‍ത്തിക്കാട്ടിയാണ് കോണ്‍ഗ്രസ് വിമര്‍ശനം കടുപ്പിക്കുന്നത്. എന്നാല്‍ 22 പാര്‍ട്ടികളിലെ അംഗങ്ങള്‍ തന്നെക്കുറിച്ച് സംസാരിച്ചുവെന്നും എന്നാല്‍ പ്രധാമന്ത്രിയുടെ പ്രസംഗം മാത്രം ഉയര്‍ത്തിക്കാട്ടി വിമര്‍ശിക്കുന്നത് ശരിയല്ലെന്നും അദ്ദേഹം പറയുന്നു. രാജ്യസഭയിലെ മൂന്നില്‍ ഒ്ന്ന് അംഗങ്ങളും രണ്ട് വര്‍ഷം കൂടുമ്പോള്‍ വരമിക്കാറുണ്ട്. ചടങ്ങില്‍ വിവിധ പാര്‍ട്ടികളിലെ അംഗങ്ങള്‍ പ്രസംഗിക്കാറുണ്ടെന്നും അദ്ദേഹം പറയുന്നു.

കോണ്‍ഗ്രസില്‍ നിന്നും രാജിവെച്ച ആസാദിന്റെ ആദ്യ പൊതുപരിപാടി ഞായറാഴ്ച ജമ്മു കശ്മീരില്‍ നടക്കും. ഗുലാം നബിക്ക് പിന്തുണയുമായി കോണ്‍ഗ്രസില്‍ നിന്നും നിരവധി പേരാണ് കശ്മീരില്‍ രാജിവെച്ചത്. രണ്ടാഴ്ചയ്ക്കകം പുതിയ പാര്‍ട്ടി രൂപികരിക്കും ഇതിന്റെ പ്രഖ്യാപനം ഞായറാഴ്ച നടക്കുന്ന പരിപാടിയിലുണ്ടാകും.