അറ്റ്‌ലാന്റിക് ബോട്ടിന്റെ റജിസ്ട്രേഷൻ, തുറമുഖ വകുപ്പു മന്ത്രിയുടെ ഓഫിസ് ഇടപെട്ടു എന്ന് മൊഴി നൽകി, മാരിടൈം സിഇഒയുടെ കസേര തെറിപ്പിച്ചു

കൊച്ചി : കുട്ടികളടക്കം 22 പേരുടെ മരണത്തിന് ഇടയാക്കിയ താനൂർ ബോട്ടപകടത്തിൽ മന്ത്രിയുടെ ഓഫിസിനെതിരെ മൊഴി നൽകിയ യ മാരിടൈം ബോർഡ് സിഇഒയുടെ കസേര തെറിച്ചു. ‘അറ്റ്‌ലാന്റിക്’ ബോട്ടിനു റജിസ്ട്രേഷൻ നൽകാൻ തുറമുഖ വകുപ്പു മന്ത്രിയുടെ ഓഫിസ് ഇടപെട്ടു എന്ന് ചീഫ് ഓപ്പറേറ്റിങ് ഓഫിസർ ടി.പി.സലിംകുമാർ പൊലീസിനു മൊഴി നൽകിയിരുന്നു. ഇതിലെ പ്രതികാര നടപടിയാണ് ഇപ്പോൾ ഉണ്ടായത്.

അറ്റ്ലാന്റിക് ബോട്ടുടമ നാസറിന്റെ അപേക്ഷ പരിഗണിക്കാൻ ആവശ്യപ്പെട്ടു മന്ത്രി അഹമ്മദ് ദേവർ കോവിലിന്റെ അഡിഷനൽ പ്രൈവറ്റ് സെക്രട്ടറി സി.പി.അൻവർ സാദത്ത് തന്നെ വിളിച്ചിരുന്നു എന്നാണു ചീഫ് ഓപ്പറേറ്റിങ് ഓഫിസർ ടി.പി.സലിംകുമാർ പൊലീസിനു മൊഴി നൽകിയത്. ഇതോടെ ബോട്ടിനു റജിസ്ട്രേഷൻ ലഭിച്ചതിനു പിന്നിൽ ഉന്നത ഇടപെടലുണ്ടായെന്നത് വ്യക്തമായി.

ബോട്ടപകടത്തെ സാദാരണ അപകടമായി ചിത്രീകരിക്കാനും ഇതിൽ ഇടപെട്ട ഉന്നതർക്ക് മേൽ പഴി വീഴാതിരിക്കാനുമുള്ള നീക്കങ്ങളാണ് സലിമിന്റെ മൊഴിയോടെ തകർന്നടിഞ്ഞത്. ബോട്ടിനു റജിസ്ട്രേഷൻ നൽകിയതിനു പിന്നിലെ ഉദ്യോഗസ്ഥ വീഴ്ചയുടെ പൂർണ ഉത്തരവാദിത്തം സിഇഒയുടെയും കീഴുദ്യോഗസ്ഥരുടെയും ചുമലിൽ വച്ച് ഉന്നതരെ രക്ഷിക്കാനുള്ള ശ്രമവും സജീവമാണ്. .സലിംകുമാർ നൽകിയ മൊഴിയെ അന്വേഷണ പരിധിയിൽ എത്തിക്കുന്നില്ല എന്നതാണ് വാസ്തവം.

നാസറിന്റെ ബോട്ടിനു റജിസ്ട്രേഷൻ നൽകുന്നതുമായി ബന്ധപ്പെട്ടു മന്ത്രിയുടെ അഡീഷനൽ പിഎസ് വിളിച്ചെങ്കിലും താൻ ഇതുകൊണ്ടല്ല തുടർനടപടിക്കു നിർദേശം നൽകിയതെന്നും മറിച്ചു ‘നിയമപ്രകാരം സാധ്യമായതിനാലാണ്’ എന്നും സലിമിന്റെ മൊഴിയിലുണ്ട്. മുൻകൂർ അനുമതിയില്ലാതെ നിർമിച്ച ബോട്ട് ആയതിനാൽ റജിസ്ട്രേഷൻ നടത്താനാവില്ലെന്നു റജിസ്റ്ററിങ് അതോറിറ്റിയായ ആലപ്പുഴ പോർട്ട് ഓഫിസർ റിപ്പോർട്ട് നൽകിയിരുന്നതാണെന്നും വെളിപ്പെടുത്തിയിട്ടുണ്ട്.