മീൻപിടിക്കുന്ന ‘ഡപ്പവള്ളം’ 95,000 രൂപയ്ക്ക് വാങ്ങി, രൂപമാറ്റംവരുത്തി ‘അറ്റ്‌ലാന്റിക്’ എന്ന ഉല്ലാസ ബോട്ടായി, ഫിറ്റനസ് ലഭിക്കുംമുമ്പ് സർവീസും തുടങ്ങി

പൊന്നാനി: 22 പേരുടെ മരണത്തിനിടയാക്കിയ താനൂർ ബോട്ടപകടത്തിൽ കൂടുതൽ വിവരങ്ങൾ പുറത്ത്.
‘കുഞ്ഞിമരയ്ക്കാർ ശഹീദ്’ എന്ന മീൻപിടിത്ത ഫൈബർവള്ളം രൂപമാറ്റംവരുത്തിയപ്പോൾ താനൂരിൽ അപകടത്തിൽപ്പെട്ട ‘അറ്റ്‌ലാന്റിക്’ എന്ന ഉല്ലാസ ബോട്ടായി. 95,000 രൂപയ്ക്ക് വാങ്ങിയ വള്ളമാണ് എട്ടു ലക്ഷത്തോളം രൂപ ചെലവിട്ട് അറ്റകുറ്റപ്പണികൾ നടത്തി ബോട്ടിങ്ങിനായി ഉപയോഗിച്ചത്. ഡിസംബറിൽ താനൂരിലേക്ക് കൊണ്ടുപോയി അവസാനഘട്ട പണികൾ പൂർത്തിയാക്കിയതായാണ് വിവരം.

ചെറിയ ദൂരത്തിൽപ്പോയി മീൻപിടിക്കുന്നതിനുള്ള ‘ഡപ്പവള്ളം’ എന്ന വിഭാഗത്തിൽപ്പെടുന്നതായിരുന്നു ബോട്ട്.
പാലപ്പെട്ട് അജ്മീർ നഗർ സ്വദേശി ഹംസയുടേതായിരുന്നു ഇത്. പൊന്നാനി സ്വദേശി കബീറാണ് ബോട്ട് വിൽപ്പനയ്ക്ക് ഇടനിലക്കാരനായി നിന്നത്. ബോട്ടു വാങ്ങിയ നാസറും പണി നടക്കുന്ന കേന്ദ്രത്തിലെത്തിയിരുന്നു.

ബോട്ട് രൂപമാറ്റം വരുത്തിയതിനെക്കുറിച്ച് പോലീസ് അന്വേഷിക്കുന്നുണ്ട്. മത്സ്യബന്ധനത്തിന് ഉപയോഗിക്കുന്ന വള്ളം രൂപംമാറ്റംവരുത്തി ഉല്ലാസബോട്ട് ആക്കുന്നതിൽ തെറ്റില്ലെന്നാണ് ചീഫ് സർവേയർ പറയുന്നത്. മീൻപിടിത്തബോട്ടാണ് യാത്രാബോട്ടാക്കി മാറ്റാൻ ഉടമ അപേക്ഷനൽകിയിരുന്നത്. ഇതിനുള്ള നിബന്ധനകൾ പാലിച്ചോ എന്നറിയാൻ മാരിടൈം ബോർഡിന്റെ സർവേയർ ആലപ്പുഴയിൽ നിന്നെത്തി പരിശോധനനടത്തി. അപാകതകൾ കണ്ടെത്തുകയും ഇവ പരിഹരിക്കാനും നിർദേശം നൽകിയിരുന്നു.

പിന്നാലെ അപാകതകൾ പരിഹരിച്ചതായി കാണിച്ച് വീണ്ടും അപേക്ഷ നൽകി. തുടർന്ന് സർവേയർ വീണ്ടും ബോട്ട് പരിശോധിക്കുകയും ചെയ്തു. ഈ പരിശോധനയുടെ ഫലം വരുംമുമ്പ്, കഴിഞ്ഞമാസം ബോട്ട് സർവീസ് ആരംഭിക്കുകയായിരുന്നു. ആദ്യം അപേക്ഷനൽകി ഫിറ്റനസ് സർട്ടിഫിക്കറ്റിന് അപേക്ഷിച്ചപ്പോൾ ലഭിച്ച രജിസ്‌ട്രേഷൻ നമ്പർ KIV/BPR/99/23 ബോട്ടിന്റെ യഥാർഥ രജിസ്‌ട്രേഷൻ നമ്പറാണെന്ന് കാട്ടിയായിരുന്നു സർവീസ് നടത്തിയത്.