ഒരുപാട് വികസന പദ്ധതികൾ കൊണ്ടുവരും, കൊല്ലത്തെ നമ്പർ വൺ ജില്ലയാക്കണം എന്നാണ് ആ​ഗ്രഹം, വിജയപ്രതീക്ഷയോടെ കൃഷ്ണകുമാർ

കൊല്ലം: വിജയ പ്രതീക്ഷയുണ്ടെന്നും കണക്കുകൂട്ടലുകളേക്കാൾ ജനങ്ങളുമായി ഇടപഴകാനാണ് ഇനിയുള്ള ദിവസങ്ങളിൽ തയ്യാറാകുന്നതെന്നും
കൊല്ലം ലോക്സഭാ മണ്ഡലത്തിലെ എൻഡിഎ സ്ഥാനാർത്ഥി ജി കൃഷ്ണകുമാർ. കൊല്ലത്തെ കേരളത്തിലെ ഏറ്റവും നമ്പർ വൺ ജില്ലയാക്കണം എന്നാണ് എന്റെ ആ​ഗ്രഹം. ബഹുഭൂരിപക്ഷ വോട്ടും ഇരുപാർട്ടിയിൽ നിന്നും ബിജെപിയിലേക്ക് വന്നതായാണ് അറിയാൻ സാധിക്കുന്നത്.

തെരഞ്ഞെടുപ്പ് പ്രചാരണത്തിലെ 22 ദിവസവും ജനങ്ങൾ അങ്ങേയറ്റം സ്നേ​ഹവും അം​ഗീകാരവും നൽകിയിരുന്നു. എവിടെയൊക്കെ വികസനങ്ങൾ കൊണ്ടുവരാനാകു എന്നാണ് ഞാൻ ഇനി ചിന്തിക്കുന്നത്. വരും ദിവസങ്ങളിൽ സമാധാനവും ശാന്തവുമായി കൊല്ലത്ത് പ്രവർത്തിക്കണം. എന്തൊക്കെ വികസനങ്ങൾ കൊല്ലത്ത് കൊണ്ടുവരാനാകും ഇതിനെ കുറിച്ച് ചർച്ച ചെയ്യും.

പോളിം​ഗ് കഴിഞ്ഞ വർഷത്തേക്കാൾ കുറവാണ്. കൊല്ലത്ത് നാം കണ്ടത് രണ്ട് കൂട്ടരുടെ ഭരണവിരുദ്ധ വികാരവും ഒരു പക്ഷത്തിൽ നിന്ന് ഭരണത്തിന് അനുകൂലമായ വികാരവുമാണ്. പ്രതീക്ഷയറ്റ് നിൽക്കുന്ന ജനങ്ങൾക്ക് നരേന്ദ്രമോദി കഴിഞ്ഞ പത്ത് വർഷം കൊടുത്തിരിക്കുന്നത് വികസനത്തിന്റെ പ്രതീക്ഷയാണ്. സിറ്റിം​ഗ് എംപി എന്നുള്ള നിലയിൽ എൻ കെ പ്രേമചന്ദ്രൻ ഒരു വികസന പ്രവർത്തനവും കൊല്ലത്ത് കൊണ്ടുവന്നിട്ടില്ലെന്നും കൃഷ്ണകുമാർ പറഞ്ഞു.