നമീബയിയിൽ നിന്നെത്തിച്ച പെൺചീറ്റപ്പുലി ‘സിയായ’ നാല് കുഞ്ഞുങ്ങൾക്ക് ജന്മം നൽകി, സന്തോഷം പങ്കുവെച്ച് പ്രധാനമന്ത്രി

ഭോപ്പാൽ . കുനോ ദേശീയ പാര്‍ക്കിലെ ചീറ്റപ്പുലി പ്രസവിച്ച വാര്‍ത്തയില്‍ ആഹ്‌ളാദം പ്രകടിപ്പിച്ച് പ്രധാനമന്ത്രി. അമ്മക്കും കുഞ്ഞുങ്ങള്‍ക്കും സുഖമെന്ന് അധികൃതര്‍ അറിയിച്ചു. കുനോ നാഷണൽ പാർക്കിൽ നമീബയിയിൽ നിന്നെത്തിച്ച പെൺചീറ്റപ്പുലി ‘സിയായ’ നാല് കുഞ്ഞുങ്ങൾ ക്കാണ് ജന്മം നൽകിയത്. അമ്മയും കുഞ്ഞുങ്ങളും ആരോഗ്യത്തോടെയിരിക്കുന്നുവെന്നാണ് റിപ്പോർട്ട്.

ചീറ്റകൾ ഇന്ത്യയിലെ കാലവസ്ഥയുമായി ഇണങ്ങിയതിന്റെ തെളിവാണ് പെൺചീറ്റ പ്രസവിച്ചതെന്ന് ചീറ്റ കൺസർവേഷൻ പ്രൊജക്‌ട് അധികൃതർ അറിയിച്ചിട്ടുണ്ട്. നേരത്തെ ആശയെന്ന പെൺചീറ്റ ഗർഭിണിയായിരുന്നെങ്കിലും ഗർഭമലസിയിരുന്നു. കഴിഞ്ഞ ദിവസം സാഷ എന്ന പെൺചീറ്റ വൃക്കരോഗം മൂലം ചത്തിരുന്നു. പിന്നാലെയാണ് മറ്റൊരു ചീറ്റപ്പുലി പ്രസവിച്ച വാർത്ത പുറത്തു വന്നിരിക്കുന്നത്. കുഞ്ഞുകളുടെ ചിത്രങ്ങൾ കേന്ദ്രമന്ത്രി ഭൂപേന്ദർ യാദവ് ട്വിറ്ററിൽ പങ്കുവച്ചിരുന്നു. സാഷയുടെ മരണത്തെ തുടർന്ന് എല്ലാ ചീറ്റകളെയും അൾട്രാസൗണ്ട് പരിശോധനയ്ക്ക് വിധേയമാക്കും. പുറമെ രക്തപരിശോധനയും നടത്തുന്നുണ്ട്.

കഴിഞ്ഞ വർഷം സെപ്തംബറിലാണ് ‘പ്രോജക്റ്റ് ചീറ്റ’യുടെ ഭാഗമായി ഇന്ത്യ നമീബിയയിൽ നിന്നും 5 പെണ്ണും 3 ആണും ഉൾപ്പടെ എട്ട് ചീറ്റകളെ കൊണ്ടുവരുന്നത്. ഇന്റർ കോണ്ടിനെന്റൽ ചീറ്റ ട്രാൻസ്‌ലോക്കേഷൻ പദ്ധതിയുടെ ഭാഗമായി ചരക്ക് വിമാനത്തിലാണ് എട്ട് ചീറ്റകളെ രാജ്യത്ത് എത്തിക്കുന്നത്. പിന്നീട് ഇന്ത്യൻ എയർഫോഴ്സിന്റെ ഹെലികോപ്ടറിൽ ഗ്വാളിയോർ എയർഫോഴ്സ് സ്റ്റേഷനിൽ നിന്ന് ചീറ്റകളെ കുനോ നാഷണൽ പാർക്കിലേക്ക് എത്തിക്കുകയായിരുന്നു. പ്രധാനമന്ത്രി നരേന്ദ്ര മോദിയാണ് ചീറ്റകളെ കുനോയിൽ തുറന്ന് വിടുന്നത്.