മഹാനഷ്ടം: സഭാ ടിവി പിണറായി സർക്കാർ പൂട്ടികെട്ടുന്നു.

തിരുവനന്തപുരം/ കൊട്ടിഘോഷിച്ച് ആർപ്പ് വിളികളോടെ കൊണ്ടു വന്ന നിയമസഭാ ടിവി പിണറായി സർക്കാർ പേര് മാത്രം ബാക്കി വെച്ച് പൂട്ടികെട്ടുന്നു. നിയമസഭാ ടിവി മഹാ നഷ്ടത്തിലായ സാഹചര്യത്തിലാണ് ചെലവ് ചുരുക്കലിന്റെ ഭാഗമായി പേര് മാത്രം ബാക്കി വെച്ച് നിർത്താൻ തീരുമാനിച്ചിരിക്കുന്നത്. അഞ്ചരക്കോടി രൂപയാണ് സംസ്ഥാന സർക്കാർ ഇതിനകം നിയമസഭാ ടിവിക്കായി ചിലവഴിച്ചത്. തിരികെ വരുമാനമായി കിട്ടിയ തുകയിൽ നിന്ന് തിരിച്ച് ഖജനാവിലെത്തിയതാകട്ടെ വെറും 91 ലക്ഷവും.

നിയമസഭാ ടിവിയുടെ പ്രവർത്തനം ആരംഭിച്ചശേഷം ഇതുവരെ 5,41,40,201 രൂപ ചെലവായെന്ന് സ്പീക്കർ എം.ബി. രാജേഷ് അറിയിച്ചു. ഇതിൽ 54 ശതമാനവും ചാനലുകളുടെ ടൈംസ്ലോട്ട് വാങ്ങി സഭാ ടി.വിയുടെ പരിപാടികൾ സംപ്രേഷണത്തിന് കൈമാറുന്ന വകയിൽ ചിലവഴിച്ചു വരുകയായിരുന്നു.

ഇതിനകം പരിപാടികൾ സംപ്രേക്ഷണം ചെയ്യാൻ മാത്രം ചാനലുകൾക്ക് 2,39,79,201 രൂപയാണ് ചെലവഴിച്ചത്. ചാനലുകൾക്ക് നൽകാനായി പരിപാടികൾ നിർമ്മിക്കുന്നതിനായി 84,70,012 രൂപയും ചെലവഴിക്കുകയായിരുന്നു. ഒ.ടി.ടി പ്ലാറ്റ്ഫോം വികസിപ്പിക്കുന്നതിന് ആകെ 47,60,000 രൂപയാണ് ചിലവഴിച്ചത്.

സഭാ ടിവിയിൽ നിന്ന് ഇതുവരെ 1.44 കോടിയുടെ വരുമാനം തിരികെ കിട്ടിയതിൽ സർക്കാർ ഖജനാവിൽ നിന്ന് ചിലവഴിച്ച 5,41,40,201 രൂപയിൽ 91 ലക്ഷം രൂപ മാത്രമാണ് തിരികെ നൽകാനായത്. ചെലവ് ചുരുക്കലിന്റെ ഭാഗമായി സഭാ ടി വി ഇനി ചാനലുകളിൽ ടൈംസ്ലോട്ട് വാങ്ങി പരിപാടികൾ സംപ്രേക്ഷണം ചെയ്യില്ല. അതിനായുള്ള പരിപാടികളുടെ നിർമ്മാണവും നിർത്തിവെക്കും.