‘അവൻ നന്നായി കൈകാര്യം ചെയ്തെന്നു’ മാളവിക മോഹൻ, ചർച്ചയായി ‘ക്രിസ്റ്റി’യുടെ പോസ്റ്റര്‍

നവാഗതനായ ആല്‍ഹിന്‍ ഹെന്‍ട്രി സംവിധാനം ചെയ്യുന്ന പുതിയ ചിത്രം ‘ക്രിസ്റ്റി’യുടെ പുതിയ പോസ്റ്റര്‍ പുറത്തിറങ്ങി. മാളവിക മോഹനനും മാത്യു തോമസും പ്രധാന വേഷത്തിലെത്തുന്ന ചിത്രം ഫെബ്രുവരിയില്‍ തിയേറ്ററുകളിലെത്തുകയാണ്. സിനിമയുടെ പുതിയ പോസ്റ്റര്‍ പങ്കുവെച്ച് ഒരു ആരാധകന്‍ പോസ്റ്റ് ചെയ്ത ട്വീറ്റും അതിന് നായിക മാളവിക നല്‍കിയ മറുപടിയും സോഷ്യല്‍ മീഡിയയിൽ ചര്‍ച്ചയായിരിക്കുകയാണ്.

സിനിമയുടെ പോസ്റ്ററും മാളവികയുടെ ഒരു ഗ്ലാമര്‍ ലുക്കിലുള്ള ചിത്രവും പോസ്റ്റ് ചെയ്തതിനൊപ്പം ‘മാത്യു ഇത് എങ്ങനെ കൈകാര്യം ചെയ്യുമെന്നാണ് എന്റെ ടെൻഷൻ’ എന്ന് ഒരു ആരാധകൻ കുറിച്ചതാണ് വൈറലായിരിക്കുന്നത്. ‘അവൻ അത് നന്നായി കൈകാര്യം ചെയ്തു’ എന്ന് മാളവിക കമന്റിന് മറുപടിയും നല്‍കി.

പോസ്റ്റർ കണ്ടിട്ട് പ്രായമായ സ്ത്രീയും കൗമാരക്കാരനുമായുള്ള പ്രണയ കഥ പോലെ തോന്നി അത് മാത്യുവിന് കൈകാര്യം ചെയ്യാൻ കഴിയുമോ എന്ന സംശയമാണ് ചോദ്യമായിപ്രകടിപ്പിച്ചതെന്ന് കമന്റ് ചെയ്ത ആരാധകൻ പിന്നീട് വിശദീകരിക്കുക യുണ്ടായി. എന്നാൽ അപ്പോഴേക്കും ആരാധകന്‍റെ കമന്‍റ് സോഷ്യല്‍ മീഡിയ ഏറ്റെടുത്ത് കഴിഞ്ഞിരുന്നു. സിനിമയുടെ കഥാപശ്ചാത്തലത്തെ കുറിച്ച് ഔദ്യോഗികമായ ഒരു വിവരവും അണിയറ പ്രവര്‍ത്തകര്‍ ഇതുവരെ പങ്കുവെച്ചിട്ടില്ല.

സിനിമയുടെ ടീസറും ട്രെയിലറും പുറത്തുവരുന്നതോടെ ഇതേക്കുറിച്ച് ഒക്കെ അറിയാനാവും. റോക്കി മൗണ്ടെയിൻ സിനിമാസിന്റെ ബാനറിൽ സജയ് സെബാസ്റ്റ്യൻ, കണ്ണൻ സതീശൻ എന്നിവർ ചേർന്നാണ് ക്രിസ്റ്റി നിർമിക്കുന്നത് . തിരുവനന്തപുരത്തെ പൂവാര്‍ എന്ന പ്രധാന ലൊക്കേഷനായി വരുന്ന ചിത്രം യഥാർഥ സംഭവങ്ങളെ ആസ്പദമാക്കിയാണ് ഒരുക്കിയിട്ടുള്ളത്.