യുവാവിനെ തല്ലിച്ചതച്ചു, നിലവിളിച്ചിട്ടും വിട്ടില്ല, സംഭവം തിരുവനന്തപുരം മെഡിക്കൽ കോളേജിൽ

തിരുവനന്തപുരം : യുവാവിനെ കൂട്ടം ചേർന്ന് മർദിച്ചതിന്റെ നടുക്കുന്ന ദൃശ്യങ്ങൾ പുറത്തു വന്നു. തിരുവനന്തപുരം മെഡിക്കൽ കോളേജിൽ ആണ് സംഭവം. വിളപ്പിൽശാല സ്വദേശി അനന്ദുവിനാണ് മർദനമേറ്റത്. മെഡിക്കൽ കോളേജ് പോലീസ് അന്വേഷണം ആരംഭിച്ചു.

കഴിഞ്ഞ ദിവസം ഉച്ചയോടെ ആയിരുന്നു യുവാവിന് ക്രൂരമർദനമേറ്റത്‌. പോലീസ് പറയുന്നത്; യുവാവ് കഴിഞ്ഞ കുറച്ചു ദിവസങ്ങളായി വീട്ടിൽ നിന്ന് പിണങ്ങി മാറി നിൽക്കുകയാണ്. മെഡിക്കൽ കോളേജ് പരിസരത്ത് അലഞ്ഞ് തിരിഞ്ഞ് നടക്കുകയും അവിടെ നിന്ന് തന്നെ ആഹാരം കഴിക്കുകയും താമസമാക്കുകയും ചെയ്യുന്ന സാഹചര്യമായിരുന്നു.

ഇതോടെ മെഡിക്കൽ കോളേജ് പരിസരത്തുള്ളവർ തന്നെയാണ് യുവാവിനെ മർദിച്ചതെന്നാണ് പോലീസ് പറയുന്നത്. യുവാവിനെ പ്രദേശവാസികൾ തടി അടക്കം ഉപയോഗിച്ചാണ് ആക്രമിച്ചത്. അടിയേൽക്കുമ്പോൾ യുവാവ് ആർത്തുകരയുന്നതും ദൃശ്യങ്ങളിൽ കേൾക്കാം. മ്യൂസിയം പോലീസ് കേസ് രജിസ്റ്റർ ചെയ്ത് അന്വേഷണം തുടങ്ങിയിട്ടുണ്ട്.