തേക്കടി ബോട്ട് ദുരന്തം, നാല് വർഷം മുൻപ് കുറ്റപത്രം സമർപ്പിച്ചു, പതിനാല് വർഷത്തിനിപ്പുറവും വിചാരണ തുടങ്ങിയില്ല

ഇടുക്കി: 2009-ൽ നാടിനെ നടുക്കിയ തേക്കടി ബോട്ട് ദുരന്തത്തിൽ പതിനാല് വർഷത്തിനിപ്പുറവും വിചാരണ തുടങ്ങിയില്ല. സംസ്ഥാനത്തെ ഏറ്റവും വലിയ ബോട്ട് അപകടം ആയിരുന്നു അത്. 2009 സെപ്റ്റംബർ 30-നായിരുന്നു നാടിനെ നടുക്കിയ തേക്കടി ദുരന്തം. കെടിഡിസിയുടെ ഇരുനില ബോട്ടായ ജലകന്യകയാണ് മുങ്ങിയത്. അപകടത്തിൽ ഏഴ് കുട്ടികളും 23 വനിതകളുമടക്കം 45 പേർ മരിച്ചു. 82 വിനോദ സഞ്ചാരികളായിരുന്നു ബോട്ടിൽ ഉണ്ടായിരുന്നത്.

സംഭവത്തിൽ നാല് വർഷം മുൻപ് കുറ്റപത്രം സമർപ്പിച്ചെങ്കിലും സ്‌പെഷ്യൽ പ്രോസിക്യൂട്ടറുടെ നിയമനം നീണ്ടുപോയി. ദുരന്തമുണ്ടായ 2009-ൽ തന്നെ സർക്കാർ സ്‌പെഷ്യൽ പ്രോസിക്യൂട്ടറായി ഹൈക്കോടതി അഭിഭാഷകനെ നിയമിച്ചിരുന്നു. എന്നാൽ ഇദ്ദേഹം പിന്നീട് സ്ഥാനമൊഴിയുകയായിരുന്നു. പിന്നീട് നിയമിച്ച പ്രോസിക്യൂട്ടറും 2021-ൽ രാജിവെക്കുകയായിരുന്നു. ഏഴ് മാസം മുൻപ് അഡ്വ.ഇ.എ റഹീമിനെ സ്‌പെഷ്യൽ പ്രോസിക്യൂട്ടറായി നിയമിക്കുകയുണ്ടായി.

റഹീം പ്രോസിക്യൂട്ടറായി ചുമതല ഏറ്റെടുത്തപ്പോഴേക്കും തൊടുപുഴ ഫാസ്റ്റ് ട്രാക്ക് കോടതി-2ലെ ജഡ്ജി മാറി. ഈ മാസം അവസാനത്തോടെ പുതിയ ജഡ്ജിയെ നിയമിക്കുമെന്നാണ് കരുതുന്നത്. ഐജിയായിരുന്ന ശ്രീലേഖയുടെ മേൽനോട്ടത്തിൽ ക്രൈംബ്രാഞ്ച് എസ്പി പിഎ വത്സനായിരുന്നു കേസിന്റെ അന്വേഷണ ചുമതല. ബോട്ട് ജീവനക്കാരടക്കം ഏഴ് പേരായിരുന്നു കേസിലെ പ്രതികൾ. ആദ്യം അന്വേഷണസംഘം സമർപ്പിച്ച കുറ്റപത്രം കോടതി തള്ളിയിരുന്നു.

പിന്നാലെ അഞ്ച് വർഷത്തോളമാണ് തുടരന്വേഷണം എങ്ങുമെത്താതെ നീണ്ടു. കോട്ടയം ജില്ലാ ക്രൈംബ്രാഞ്ച് എസ്പി സാബു മാത്യു കേസ് ഏറ്റെടുത്തതോടെയാണ് വീണ്ടും അന്വേഷണത്തിൽ പുരോഗതിയുണ്ടാവുന്നത്. 2014ഡിസംബർ 24-ന് തൊടുപുഴ നാലാം അഡീഷണൽ സെഷൻന്‌സ് കോടതി കുറ്റകൃത്യങ്ങൾ രണ്ട് തരത്തിലാണെന്ന് കണ്ടെത്തിയിരുന്നു. രണ്ട് കുറ്റപത്രം സമർപ്പിക്കാനും ഉത്തരവായി.

ഒന്നാം കുറ്റപത്രത്തിൽ ഏഴ് പ്രതികളെ ആയിരുന്നു ഉൾപ്പെടുത്തിയിരുന്നത്. 139 സാക്ഷികളുമുണ്ട്. ബോട്ട് നിർമ്മിച്ച കെടിഡിസി ഉൾപ്പെടെയുണ്ടായ വീഴ്ചകൾ വിശദീകരിച്ചിരിക്കുന്നത് രണ്ടാമത്തെ കുറ്റപത്രത്തിലായിരുന്നു. എന്നാൽ രണ്ടാം കുറ്റപത്രം സ്‌പെഷ്യൽ പ്രോസിക്യൂട്ടർക്ക് പോലും ഇനിയും ലഭ്യമായിട്ടില്ല. 45 പേർ മരിക്കാനിടയായ സംഭവത്തിൽ പതിനാല് വർഷം പിന്നിട്ടിട്ടും ആർക്കും വിചാരണ നടപടികൾ തുടങ്ങാതെ ഫയലുകളിൽ മാത്രമായി കുടുങ്ങിക്കിടക്കുകയാണ്.