തെറ്റുകാരനാണെങ്കില്‍ എന്നെ ക്രൂശിച്ചോളു, കണ്ണ് നിറഞ്ഞ് ടിനി ടോം

മലയാളികളുടെ പ്രിയപ്പെട്ട നടനാണ് ടിനി ടോം. ഇപ്പോള്‍ തനിക്കെതിരെ നടക്കുന്ന സൈബര്‍ ആക്രമണങ്ങള്‍ക്ക് എതിരെ രംഗത്ത് എത്തിയിരിക്കുകയാണ് അദ്ദേഹം. വ്യാപകമായി ആക്രമണം ഉണ്ടാകുന്നുവെന്നും പലപ്പോഴായി പല വിഷയങ്ങളില്‍ ഇത് തുടരുകയാണെന്നും ടിനി ടോം പറയുന്നു. ഇപ്പോള്‍ ഷംന കസിം കേസില്‍ തന്നെ ചോദ്യം ചെയ്യുമെന്ന രീതിയിലാണ് പ്രചാരണം നടക്കുന്നതെന്ന് ഫേസ്ബുക്ക് ലൈവിലെത്തി അദ്ദേഹം പറഞ്ഞു.

ഷംനയോ, പ്രതികളോ തന്റെ പേര് പറഞ്ഞിട്ടില്ല. അന്വേഷണ ഉദ്യോഗസ്ഥരോട് തിരക്കിയാല്‍ ഇക്കാര്യം അറിയാവുന്നതാണ്. എന്നിട്ടും വ്യാജവാര്‍ത്തകള്‍ പ്രചരിപ്പിക്കുകയാണ്. അമ്മയുടെ എക്‌സിക്യൂട്ടീവ് യോഗത്തിന് ശേഷം പരാതി നല്‍കുന്ന കാര്യം ആലോചിക്കുമെന്നും ടിനി ടോം പറഞ്ഞു. എന്റെ അമ്മ കണ്ണുനിറഞ്ഞ് എന്നോട് ചോദിച്ച്, നീ ഇതിനകത്ത് ഉണ്ടോയെന്ന്.. കണ്ണുകള്‍ നിറഞ്ഞായിരുന്നു ടിനി ടോം ഫേസ്ബുക്ക് ലൈവില്‍ എത്തിയത്.

തന്നെ ചിലര്‍ ഇതിലേക്ക് വലിച്ചിഴയ്ക്കുകയാണ്. പ്രതികളോ, ഷംനയോ പറയാത്ത കാര്യങ്ങളാണ് ചിലര്‍ പ്രചരിപ്പിക്കുന്നത്. ഇന്റര്‍വ്യൂ തന്നില്ലെന്ന് പറഞ്ഞ് വൈരാഗ്യം തീര്‍ക്കരുത്. അതുകൊണ്ട് ഈ കേസുമായി ബന്ധപ്പെട്ട് ഇല്ലാത്ത കാര്യങ്ങള്‍ പ്രചരിപ്പിക്കരുത്. ഇതിനെ നിയമപരമായി നേരിടാനാകാഞ്ഞിട്ടല്ല. മനുഷ്യത്വമായി കാണണം. നന്മയുടെ സത്യത്തിന്റെയും കൂടെ നില്‍ക്കണം. ഒരുപെണ്‍കുട്ടിയോട് പോലും മോശമായി പെരുമാറിയിട്ടില്ല. ആഗ്രഹം കൊണ്ട് കലാരംഗത്ത് എത്തിയതാണ്. ഒരിക്കലും ഉപദ്രവിക്കരുതെന്നും തെറ്റുകാരനാണെങ്കില്‍ എന്നെ ക്രൂശിച്ചോളു എന്നും ടിനി ടോം പറഞ്ഞു.

ഷംനാ കാസിമിന്റെ പരാതിയുമായി ബന്ധപ്പെട്ട് ഉയര്‍ന്ന കേസുകളില്‍ ടിനി ടോമിനെ ചോദ്യം ചെയ്തു എന്ന തരത്തില്‍ സമൂഹമാധ്യമങ്ങളില്‍ പ്രചാരണം ഉണ്ടായിരുന്നു. ഇതിനെതിരെയാണ് താരത്തിന്റെ പ്രതികരണം. കള്ളക്കടത്തുമായോ ഇപ്പോള്‍ പിടിയിലായ സംഘവുമായോ തനിക്ക് ഒരു ബന്ധവുമില്ലെന്നും പൊലീസ് തന്നെ വിളിച്ചിട്ടു പോലുമില്ലെന്നും ടിനി പറയുന്നു. സംഭവത്തില്‍ എംപിക്കും എംഎല്‍എയ്ക്കും പരാതി നല്‍കിയിട്ടുണ്ടെന്നും ടിനി ഫെയ്‌സ്ബുക്ക് ലൈവില്‍ പറയുന്നു.