‘ഇന്ന് സണ്ണി ലിയോണിന്റെ ജന്മദിനമാണ്, പരീക്ഷ എഴുതാനാവില്ല’ ഉത്തരക്കടലാസിൽ വിദ്യാർത്ഥി.

ബോളിവുഡ് നടി സണ്ണി ലിയോണിന്റെ ജന്മദിനമായതു കൊണ്ട് പരീക്ഷ എഴുതാൻ കഴിഞ്ഞില്ലെന്ന് ഉത്തരക്കടലാസിൽ ബിരുദ വിദ്യാര്‍ഥി അറിയിച്ചത് മൂല്യ നിർണയം നടത്തിയ അധ്യാപകരെ അമ്പരപ്പിച്ചു. വ്യാഴാഴ്ച നടന്ന മൂല്യനിര്‍ണയത്തിലാണ് വിചിത്രമായ ഉത്തരക്കടലാസ് കണ്ടെത്തുന്നത്. മെയ്, ജൂണ്‍ മാസങ്ങളില്‍ ആയിരുന്നു സര്‍വകലാശാല ബിരുദ (യുജി) പരീക്ഷകള്‍ നടന്നത്. ഉത്തരക്കടലാസില്‍ വിദ്യാര്‍ഥി കുറിച്ചത് കണ്ട് ഞെട്ടിപ്പോയി അധ്യാപകർ.

ഹിസ്റ്ററി പരീക്ഷ നടന്നത് മെയ് മാസത്തിലാണ്. സര്‍വകലാശാല മൂല്യനിര്‍ണ്ണയ സംവിധാനം ഡിജിറ്റൈസ് ചെയ്തിട്ടുണ്ട്. മൂല്യനിര്‍ണ്ണയം നടത്തിയയാള്‍ സിസ്റ്റം ലോഗിന്‍ ചെയ്തപ്പോള്‍ ഉത്തരക്കടലാസ് കണ്ട് ഞെട്ടി.ചോദ്യങ്ങള്‍ക്ക് ഉത്തരം നല്‍കുന്നതിനു പകരം ആദ്യത്തെ ചോദ്യത്തിന്റെ ഉത്തരം മായ്ച്ചുകളയുകയും രണ്ടാമത്തെ ചോദ്യത്തിന് ഇത്തരത്തില്‍ ഉത്തരം നല്‍കുകയുമായിരുന്നു വിദ്യാർത്ഥി ചെയ്തിരുന്നത്.

‘ഇന്ന് സണ്ണി ലിയോണിന്റെ ജന്മദിനമാണ്. അവള്‍ എന്റെ കാമുകിയാണ്. അവളുടെ ജന്മദിനമായതിനാല്‍ ഇന്നത്തെ പരീക്ഷ എഴുതാനാവില്ല. സണ്ണി ലിയോണിന്റെ ജന്മദിനമായതിനാല്‍ പരീക്ഷയ്ക്ക് വേണ്ടവിധം തയ്യാറെടുത്തിട്ടില്ല’, വിദ്യാര്‍ഥി ഉത്തരക്കടലാസില്‍ കുറിച്ചു.

ഒപ്പം, തന്റെ സുഹൃത്തുക്കളും മറ്റുള്ളവരോടും ഉത്തരക്കടലാസ് മൂല്യനിര്‍ണയം നടത്തുന്നയാളോടും സണ്ണി ലിയോണിന് ജന്മദിനാശംസകള്‍ നല്‍കാന്‍ വിദ്യാര്‍ഥി അഭ്യര്‍ഥിക്കുകയും ഉണ്ടായി. കഴിഞ്ഞ മെയില്‍ നടത്തിയ പരീക്ഷയുടെ മൂല്യനിര്‍ണയം ഇപ്പോഴാണ് നടന്ന് വരുന്നത്.