ജോലി സമ്മർദം താങ്ങാനായില്ല, വിഷം കഴിച്ച് ആത്മഹത്യക്ക് ശ്രമിച്ച എസ്.ഐ. മരിച്ചു

ബേഡഡുക്ക : ജോലി സമ്മർദം താങ്ങാനാകാതെ വിഷം കഴിച്ച് ആത്മഹത്യക്ക് ശ്രമിച്ച എസ്.ഐ. മരിച്ചു. പനത്തടി മാനടുക്കം പാടിയിൽ കെ. വിജയൻ (49) ആണ് മരിച്ചത്. ശനിയാഴ്ച വൈകീട്ട് ആറരയോടെ എറണാകുളം അമൃത ആസ്പത്രിയിലാണ് അന്ത്യം. ഏപ്രിൽ 29-ന് രാവിലെ ബേഡകം സ്റ്റേഷനിലെ ക്വാർട്ടേഴ്സിലാണ് വിഷം അകത്തുചെന്ന നിലയിൽ ഇദ്ദേഹത്തെ കണ്ടെത്തിയത്.

പിന്നാലെ മംഗളൂരുവിൽ ചികിത്സയിലായിരുന്നു. പിന്നീട്‌ എറണാകാളത്തെ ആസ്‌പത്രിയിലേക്ക്‌ മാറ്റുകയായിരുന്നു. ജോലി സമ്മർദം താങ്ങാനാകാത്തതുകൊണ്ടാണ് വിഷം കഴിച്ച് ആത്മഹത്യ ചെയ്യാൻ തീരുമാനിച്ചതെന്നാണ് ഇദ്ദേഹം ചികിത്സയിലിരിക്കേ പോലീസിനോട് പറഞ്ഞിരുന്നു.

ബേഡകം സ്റ്റേഷൻ പരിധിയിലുണ്ടായ രാഷ്ട്രീയമുന്നണികളുടെ തർക്കം സംബന്ധിച്ച കേസിന്റെ അന്വേഷണച്ചുമതലയും ഇദ്ദേഹത്തിനായിരുന്നു. ലോക്‌സഭാ തിരഞ്ഞെടുപ്പുമായി ബന്ധപ്പെട്ടായിരുന്നു തർക്കം. ഈ കേസിൽ വിവിധ ഭാഗങ്ങളിൽനിന്നുണ്ടായ സമ്മർദമാണ് ഇദ്ദേഹത്തെ ആത്മഹത്യയിലേക്ക് നയിച്ചതെന്നാണ് കരുതുന്നത്.