പുരോഗമന ശബ്ദങ്ങളെ അടിച്ചമര്‍ത്താൻ അനുവദിക്കില്ല, നടി ഗായത്രിക്ക് പൂര്‍ണ്ണ പിന്തുണ നല്‍കി വീണാ ജോര്‍ജ്

മലയാള സീരിയല്‍ കലാ രംഗത്ത് സവര്‍ണ്ണ മേധാവിത്വമാണ് കാണാൻ കഴിയുന്നതെന്ന നടി ഗായത്രിയുടെ പരാമര്‍ശം വൻ വിവാദങ്ങള്‍ക്കാണ് തുടക്കമിട്ടത്. നവ കേരള സദസിന് മുന്നോടിയായി നാദാപുരം നിയോജക മണ്ഡലത്തില്‍ നടത്തിയ പ്രസംഗത്തിലായിരുന്നു നടിയുടെ പരാമര്‍ശം.

കുറിപ്പ് വായിക്കാം

സിനിമകളിലെയും സീരിയലിലെയും സാംസ്കാരിക പ്രതിനിധാനത്തിന്റെ രാഷ്ട്രീയം പറഞ്ഞ നടി ഗായത്രി വര്‍ഷയ്ക്ക് എതിരായ സൈബര്‍ ആക്രമണം പ്രതിഷേധാര്‍ഹമാണ്. നരേന്ദ്ര മോദി സര്‍ക്കാരും കോര്‍പ്പറേറ്റുകളും തമ്മിലുള്ള സഖ്യം സാംസ്കാരിക രംഗത്തെ എങ്ങനെ ഭരിക്കുന്നു എന്ന് ചൂണ്ടിക്കാട്ടിക്കൊണ്ട് നടത്തിയ പ്രസംഗം ആണ് ഈ സൈബര്‍ ആക്രമണത്തിന് കാരണം.

സാംസ്കാരിക വിമര്‍ശനത്തോടുള്ള ഇക്കൂട്ടരുടെ അസഹിഷ്ണുത സമകാലിക ഇന്ത്യ നേരിടുന്ന വലിയ വെല്ലുവിളിയാണ്. ഇത്തരം സൈബര്‍ ആക്രമണം കൊണ്ട് പുരോഗമന രാഷ്ട്രീയത്തിന്റെ സ്ത്രീ ശബ്ദങ്ങളെ നിശബ്ദമാക്കാൻ കഴിയില്ല. പുരോഗമന കലാസാഹിത്യ സംഘം സംസ്ഥാന സമിതി അംഗം കൂടിയായ ഗായത്രി വര്‍ഷയ്ക്ക് എല്ലാവിധ ഐക്യദാര്‍ഢ്യവും.

​ഗായത്രിയുടെ വാക്കുകൾ ഇങ്ങനെയായിരുന്നു

ഞാൻ അടക്കമുള്ളവർ അഭിനയിക്കുന്ന സീരിയലുകളിൽ, ഒരു ന്യൂന പക്ഷ കഥയുണ്ടോ.. മുസ്ലീമിന്റെയോ ക്രിസ്ത്യാനിയുടെയോ കഥയുണ്ടോ. ആറു മണി മുതൽ 10 മണി വരെയുള്ള ഏതെങ്കിലും സീരിയലുകളിൽ ഒരു മുസൽമാനുണ്ടോ, ക്രിസ്ത്യനുണ്ടോ,ഒരു ​ദളിതനുണ്ടോ.ന​ഗ്നത മറയ്‌ക്കാൻ അവകാശം വേണമെന്ന് പറഞ്ഞു കൊണ്ട് മാറ് മുറിച്ച് കൊടുത്ത നങ്ങേലിയുടെ, അദ്ധ്വാനിക്കുന്ന ജനതയുടെ കൊയ്ത് അരിവാളിന്റെ പാട്ട് പാടുന്ന ഒരു പെണ്ണിനെ നമ്മുടെ ടിവിയിൽ കാണുന്നുണ്ടോ..അവരാരും കാണാൻ കൊള്ളില്ലേ… നമ്മൾ എപ്പോഴും കരയുന്ന പേടിപ്പെടുത്തുന്ന ഭീതിപ്പെടുത്തുന്ന സീരിയലുകൾ കണ്ടാൽ മതിയെന്ന ഒരു ചട്ടകൂടുണ്ട്. ഒരു ട്രയാങ്കളാണ് ഇത് തീരുമാനിക്കുന്നത്.

ഏതെങ്കിലും സീരിയലിൽ ഒരു മുസൽമാൻ കഥാപാത്രമുണ്ടോ… ചട്ടയും മുണ്ടും ഉടുത്ത ഒരു സ്ത്രീയുണ്ടോ.. ഒരു പള്ളീലച്ഛനുണ്ടോ… ഒരു മൊല്ലാക്കയുണ്ടോ… ഒരു ദളിതനുണ്ടോ, ഒരു സീരിയലിൽ സുന്ദരിയെന്ന് പേരിട്ട് ഒരു കറുത്ത മുത്തിനെ കൊണ്ട് വന്നിട്ടും അവളെ വെളുപ്പിച്ചാണ് കാണിക്കുന്നത്. അവളെ പൊട്ടിട്ട് വെളുപ്പിച്ച് ചന്ദനക്കുറിയിട്ട് പട്ടുസാരി ഉടുപ്പിച്ച് സവർണ മേധാവിത്വത്തിന്റെ വിധത്തിലാണ് പുറത്ത് അവതരിപ്പിക്കുന്നത്.