തന്നെ കുടിക്കിയതിന് പിന്നിൽ പ്രിന്‍സിപ്പല്‍ എന്ന് വിദ്യ, വിദ്യ ആരെന്നുപോലും അറിയില്ലായിരുന്നുവെന്ന് അട്ടപ്പാടി കോളേജ് പ്രിൻസിപ്പൽ

പാലക്കാട് : കൊച്ചി മഹാരാജാസ് കോളേജിന്റെ പേരിൽ വ്യാജ രേഖ ചമച്ച കേസിൽ എസ്എഫ്ഐ നേതാവ് കെ വിദ്യ കഴിഞ്ഞ ദിവസമാണ് അറസ്റ്റിലായത്. പോലീസ് നടത്തിയ ചോദ്യംചെയ്യലിൽ ആരോപണങ്ങൾ എല്ലാം തള്ളിയ വിദ്യ, തന്നെ കുടുക്കിയതിന് പിന്നിൽ അട്ടപ്പാടി രാജീവ് ഗാന്ധി മെമ്മോറിയല്‍ ഗവ. കോളേജ് പ്രിന്‍സിപ്പല്‍ ആണെന്ന് ആരോപിച്ചിരുന്നു. എന്നാൽ വിദ്യ ആരാണെന്ന് പോലും അറിയില്ലായിരുന്നു. ഔദ്യോഗിക ജീവിതത്തില്‍ രാഷ്ട്രീയ വിവേചനം കാണിച്ചിട്ടില്ലെന്നും പ്രിന്‍സിപ്പല്‍ ലാലിമോള്‍ പ്രതികരിച്ചു.

അട്ടപ്പാടി രാജീവ് ഗാന്ധി മെമ്മോറിയല്‍ ഗവ. കോളേജിലെ ഇന്റര്‍വ്യൂ ബോര്‍ഡിലുള്ളവരാണ് തന്നോട് സര്‍ട്ടിഫിക്കറ്റിന്റെ കാര്യം പറഞ്ഞതെന്നും, താന്‍ ഒരു ഗൂഢാലോചനയും നടത്തിയിട്ടില്ലെന്നും പ്രിന്‍സിപ്പല്‍ പ്രതികരിച്ചു. ഒരു കുട്ടികളോടും വിവേചനം കാണിച്ചിട്ടില്ല, കാണിക്കുകയുമില്ല. എന്നാല്‍, അന്ന് ഇത്തരമൊരു വ്യാജരേഖയെന്നത് ശ്രദ്ധയിപ്പെട്ടപ്പോള്‍ വേണ്ട നടപടികൾ കൈക്കൊള്ളുക മാത്രമാണ് ചെയ്തതെന്നും പ്രിൻസിപ്പൽ പ്രതികരിച്ചു.

താൻ തെറ്റൊന്നും ചെയ്തിട്ടില്ലെന്നാണ് വിദ്യ പൊലീസിന് നൽകിയ മൊഴി. ഒരിടത്തും വ്യാജ സർട്ടിഫിക്കറ്റ് സമർപ്പിച്ചിട്ടില്ല. പഠനത്തിൽ മിടുക്കിയായ തനിക്ക് അതിന്റെ ആവശ്യമില്ലെന്നും വിദ്യ പോലീസിനോട് പറയുകയുണ്ടായി. ഇതിന് പിന്നില്‍ രാഷ്ട്രീയ ഗൂഢാലോചനയാണെന്നും കോണ്‍ഗ്രസ് അനുകൂല അധ്യാപക സംഘടനയിലുള്ളവർ ആണെന്നായിരുന്നു കെ. വിദ്യ പ്രാഥമിക ചോദ്യംചെയ്യലില്‍ പറഞ്ഞത്. അട്ടപ്പാടി ഗവ. കോളേജിലെ പ്രിന്‍സിപ്പലും ഗൂഢാലോചനയില്‍ പങ്കാളിയാണെന്നായിരുന്നു വിദ്യയുടെ ആരോപണം.