ഇടുക്കിയിലെ അരിക്കൊമ്പനെ തളക്കാൻ വയനാട്ടിൽ നിന്ന് വിക്രമനും, കോന്നി സുരേന്ദ്രനും രംഗത്തിറങ്ങും.

ഇടുക്കി. ഇടുക്കിയിൽ ഭീതി പരത്തുന്ന അരിക്കൊമ്പനെ പിടികൂടാന്‍ നാല് കുങ്കിയാനകൾ എത്തും. ചിന്നക്കനാൽ, ശാന്തൻപാറ പഞ്ചായത്തുകളിൽ ഭീതി പരത്തുന്ന അരിക്കൊമ്പനെ പിടികൂടേണ്ട ആവശ്യകത വർധിച്ചു വന്ന സാഹചര്യത്തിലാണ് നാല് കുങ്കിയാനകളെ ഇടുക്കിയിലേക്ക് കൊണ്ട് വരുന്നത്. കുങ്കിയാനകളിൽ ഒരെണ്ണം ഞായറാഴ്ച വയനാട്ടിൽ നിന്ന് തിരിക്കും.

വിക്രം എന്ന കുങ്കിയാനയെ ആണ് ആദ്യം കൊണ്ടു വരുന്നത്. വൈകിട്ട് നാലു മണിയോടെ കുങ്കിയാനയുമായുള്ള സംഘം വയനാട്ടിൽ നിന്നും ഇടുക്കിയിലേക്ക് തിരിക്കും. രണ്ട് കുങ്കിയാനകളെ വയനാട്ടിൽ നിന്നും കൊണ്ടു വരാനായിരുന്നു ആദ്യ തീരുമാനം. എന്നാൽ വനംവകുപ്പിൻ്റെ ലോറികളിൽ ഒരെണ്ണം ശനിയാഴ്ച അപകടത്തിൽപ്പെട്ടതോടെ ഒരാനയുടെ യാത്ര മുടങ്ങുകയായിരുന്നു.

വിക്രമിന് ഒപ്പം കോന്നി സുരേന്ദ്രൻ, കുഞ്ചു, സൂര്യൻ എന്നീ മൂന്നാനകളും 26 അംഗ ദൗത്യസംഘവും അടുത്ത ദിവസം ഇടുക്കിയിലെത്തിച്ചേരും. ചൊവ്വാഴ്ച നടക്കുന്ന വനംവകുപ്പ് ഉദ്യോഗസ്ഥരുടെ യോഗത്തിലായിരിക്കും ആനയെ മയക്ക് വെടി വെക്കുന്ന കാര്യങ്ങൾക്ക് തീരുമാനം എടുക്കുക.