അമിത വേ​ഗത്തിൽ വന്ന സ്വകാര്യ ബസിടിച്ച് രണ്ടുപേർക്ക് ദാരുണാന്ത്യം, ബസ് ഡ്രൈവർ ഓടി രക്ഷപ്പെട്ടു

വൈപ്പിനിൽ സ്വകാര്യ ബസിന്റെ അമിത വേ​ഗതമൂലം ജീവൻ നഷ്ടപ്പെട്ടത് രണ്ടു പേർക്ക്. ചെറായി കുഞ്ഞേലിപ്പറമ്പിൽ ഇരുപത്തിയൊന്നു വയസ്സുകാരനായ ഫ്രെഡി, പള്ളിപ്പുറം കോൺവെന്റ് കുളങ്ങര അലന എന്നിവരാണ് മരിച്ചത്.വൈപ്പിൻ സ്‌കൂൾ മുറ്റത്ത് വെച്ചായിരുന്നു അപകടം സംഭവിച്ചത്. പള്ളിപ്പുറത്തെ സ്വകാര്യ സ്ഥാപനത്തിലെ ജീവനക്കാരനാണ് ഫ്രെഡി.

വിദേശത്ത് പോകുന്നതിനുള്ള നടപടികൾ പൂർത്തിയാക്കിയിരിക്കുകയായിരുന്നു അലന. പിതാവിന് മൊബൈൽ ഫോൺ വാങ്ങി ബൈക്കിൽ ഫ്രെഡിയ്‌ക്കൊപ്പം മടങ്ങുമ്പോഴായിരുന്നു അപകടം. അമിതവേഗതയിലെത്തിയ ബസ് കാറിനെ മറികടക്കാൻ ശ്രമിക്കുന്നതിനിടെയണ് അപകടം ഉണ്ടായത്.

അപകടം നടന്ന ഉടനെ ബസ് ഡ്രൈവർ ഓടിരക്ഷപ്പെട്ടു. പിന്നാലെ എത്തിയ മറ്റൊരു ബൈക്കിനെയും ബസ് ഇടിച്ചെങ്കിലും യാത്രക്കാരന് പരിക്കേറ്റില്ല. നാട്ടുകാരും ഹൈവേ പൊലീസും വൈപ്പിൻ അഗ്നിരക്ഷസേനയും ചേർന്നാണ് രക്ഷാപ്രവർത്തനം നടത്തിയത്. ഇരുവരെയും ഉടൻതന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഫ്രെഡിയുടെ പിതാവ്: ജോസഫ് വർഗീസ്, അമ്മ: ബീന, സഹോദരി ഫെബി, അലനയുടെ പിതാവ്: സ്റ്റാൻലി, അമ്മ: ലീന.