മുത്തലാഖ് ചൊല്ലണമെന്ന് ആവശ്യപ്പെട്ട നവവരെ മര്‍ദ്ദിച്ച സംഭവത്തില്‍ വഴിത്തിരിവ്, യുവാവിനെതിരെ ഗുരുതര ആരോപണങ്ങളുമായി ഭാര്യ

മലപ്പുറം: മലപ്പുറം കോട്ടക്കലില്‍ മുത്തലാഖ് ചൊല്ലണമെന്ന് ആവശ്യപ്പെട്ട് നവവരനെ തട്ടിക്കൊണ്ടുപോയി മര്‍ദ്ദിച്ച സംഭവത്തില്‍ വഴിത്തിരിവ്. യുവാവിനെതിരെ പരാതിയുമായി ഭാര്യ രംഗത്തെത്തി. ഭര്‍ത്താവ് പ്രകൃതി വിരുദ്ധമായി പീഡിപ്പിച്ചുവെന്നും സ്ത്രീധനം ആവശ്യപ്പെട്ട് ഉപദ്രവിച്ചുവെന്നുമാണ് യുവതി ആരോപിച്ചത്. ഇത് ചൂണ്ടിക്കാട്ടി മലപ്പുറം എസ്പിക്ക് യുവതി പരാതി നല്‍കി. ഭര്‍ത്താവ് ലഹരിക്ക് അടിമയാണെന്നും വീട്ടില്‍ വെച്ച് പലപ്രാവശ്യം മയക്കുമരുന്ന് ഉപയോഗിച്ചിട്ടുണ്ടെന്നും യുവതിയുടെ പരാതിയില്‍ പറയുന്നു.

ഭര്‍ത്താവ് ലൈംഗിക വൈകൃതത്തിന് അടിമായണെന്നും പൃകൃതി വിരുദ്ധമായി നിരവധി തവണ പീഡിപ്പിച്ചുവെന്നും യുവതി പറയുന്നു. ഇത് എതിര്‍ത്തപ്പോള്‍ ക്രൂരമായി മര്‍ദ്ദിച്ചു. പരപുരുഷ ബന്ധം ആരോപിച്ച് തന്നെ അപമാനിച്ചു. ബന്ധുക്കളുമായി സംസാരിക്കാനോ ബന്ധു വീടുകളില്‍ പോകാനോ തന്നെ അനുവദിച്ചിരുന്നില്ലെന്നും യുവതി പരാതിയില്‍ പറയുന്നു.

ഭര്‍ത്താവും മാതാപിതാക്കളും സഹോദരിയും സ്ത്രീധനം നല്‍കിയില്ലെന്ന് ആരോപിച്ച് തന്നെ പല തവണ ഉപദ്രവിച്ചു. വിവാഹ ശേഷം ആവശ്യപ്പെട്ട അഞ്ച് ലക്ഷം രൂപ നല്‍കാത്തതില്‍ വിവാഹ സമയത്ത് ധരിച്ചിരുന്ന സ്വര്‍ണാഭരണങ്ങള്‍ ഇവര്‍ പിടിച്ചു വെച്ചു എന്നും യുവതി പറയുന്നു. പലപ്പോഴും ബോധം പോകുന്ന വിധം മര്‍ദ്ദനത്തിലും പീഡനത്തിലും പരിക്കേറ്റിരുന്നു. ആശുപത്രിയില്‍ ചികിത്സ തേടിയിരുന്നെന്നും പരാതിയിലുണ്ട്.

തനിക്ക് ഏല്‍ക്കേണ്ടി വന്ന പീഡനങ്ങള്‍ വീട്ടില്‍ പറയരുതെന്ന് പറഞ്ഞ് ഭര്‍ത്താവും വീട്ടുകാരും ഭീഷണിപ്പെടുത്തിയരുന്നു എന്നും ഭര്‍ത്താവിനും മാതാപിതാക്കള്‍ക്കും സഹോദരിക്കുമെതിരെ നടപടിയെടുക്കണെമന്നും പെണ്‍കുട്ടി എസ് പിക്ക് പരാതി നല്‍കിയിട്ടുള്ളത്. ഇതിനിടെ മര്‍ദ്ദനമേറ്റ നവവരന്‍ ആശുപത്രിയില്‍ ചികിത്സയില്‍ തുടരുകയാണ്.