ഭര്‍ത്താവ് മരിച്ചതറിഞ്ഞ് സംഭവ സ്ഥലത്തേക്ക് പോയി യുവതിക്കും സഹോദരിക്കും അപകടത്തില്‍ ദാരുണാന്ത്യം

തിരുവനന്തപുരം: ഭര്‍ത്താവിന്റെ മരണ വാര്‍ത്ത അറിഞ്ഞ് അവിടേക്ക് പുറപ്പെട്ട യുവതിക്കും സഹോദരിക്കും ദാരുണാന്ത്യം. കാര്‍ ഇടിച്ചാണ് ഇവരുടെ മരണം. പനത്തുറ ജി.ജി. കോളനിയില്‍ താമസിക്കുന്ന ഐശ്വര്യ (32), ഇവരുടെ സഹോദരി ശാരിമോള്‍ (31) എന്നിവരാണ് അപകടത്തില്‍ മരിച്ചത്. വാഴമുട്ടം തിരുവല്ലം ബൈപ്പാസിവല്‍ റോഡുമുറിച്ചു കടക്കനവെയാണ് അപകടം സംഭവിച്ചത്.

ശനിയാഴ്ച രാത്രി 9.30 ഓടെ വാഴമുട്ടം ബൈപ്പാസില്‍ പാച്ചല്ലൂര്‍ ചുടുകാട് ഭദ്രകാളി ക്ഷേത്രത്തിനടുത്താണ് സംഭവമുണ്ടായത്. കോവളം ഭാഗത്ത് നിന്നും തിരുവല്ലത്തേക്ക് പോകുകയായിരുന്ന കാറിടിച്ചാണ് സഹോദരിമാര്‍ അപകടത്തില്‍ പെടുകയായിരുന്നു. റോഡില്‍ തെറിച്ചു വീണ ഇവരെ നാട്ടുകാരും ഹൈവേ പോലീസും ചേര്‍ന്ന് മെഡിക്കല്‍ കോളജ് ആശുപത്രിയില്‍ എത്തിച്ചു.

ആശുപത്രിയില്‍ എത്തിക്കുമ്പോഴേക്കും ഐശ്വര്യയുടെ മരണം സംഭവിച്ചിരുന്നു. മൃതദേഹം മോര്‍ച്ചറിയിലേക്ക് മാറ്റി. ഗുരുതരമായി പരുക്ക് പറ്റിയ ശാരിമോളെ മെഡിക്കല്‍ കോളജ് ആശുപത്രിയിലെ തീവ്രപരിചരണ വിഭാഗത്തില്‍ പ്രവേശിപ്പിച്ചു ചികിത്സയിലായിരുന്നു. എന്നാല്‍ അര്‍ദ്ധരാത്രിയോടെ ശാരിമോള്‍ മരിച്ചു.

അപകടത്തില്‍ മരിച്ച ഐശ്വര്യയുടെ ഭര്‍ത്താവ് ശ്രീജി നെടുമങ്ങാടാണ് താമസിക്കുന്നത്. ഇദ്ദേഹം വീട്ടില്‍ തൂങ്ങി മരിച്ചുവെന്നറിഞ്ഞായിരുന്നു ഐശ്വര്യയും ശാരിമോളും അവിടേക്കു പോകുന്നതിന് ബസ് കയറാനായി ബൈപ്പാസിലെത്തിയപ്പോഴാണ് അപകടം സംഭവിച്ചതെന്ന് സമീപവാസികള്‍ പറഞ്ഞു. ഐശ്വര്യയുടെ മക്കള്‍ അഭിനയ, അവന്തിക. സജീവാണ് ശാരിമോളുടെ ഭര്‍ത്താവ്. വര്‍ഷ, അമല്‍ എന്നിവരാണ് മക്കള്‍.