ഭര്‍ത്താവിന്റെ മദ്യപാനം, മകള്‍ക്ക് വിഷം നല്‍കി ചിത്രങ്ങള്‍ പകര്‍ത്തി ബന്ധുക്കള്‍ക്ക് അയച്ചുകൊടുത്തു, ജീവനൊടുക്കാന്‍ ശ്രമിച്ച വീട്ടമ്മ മരിച്ചു

ശാസ്താംകോട്ട: മദ്യം പല കുടുംബങ്ങളെയും ശിഥിലമാക്കിയിട്ടുണ്ട്. എത്രയൊക്കെ നിയന്ത്രിച്ചാലും മദ്യം പലരെയും അടിമയാക്കി മാറ്റുന്നു. ഈ അടിമത്വത്തില്‍ ഇല്ലാതാവുന്നത് അവരെ ചുറ്റിപ്പറ്റിയുള്ളവരുമാണ്. ഇത്തരത്തില്‍ ഒരു സംഭവമാണ് ശാസ്താംകോട്ടയില്‍ നിന്നും പുറത്ത് എത്തുന്നത്. ഭര്‍ത്താവിന്റെ അമിത മദ്യപാനം സഹിക്ക വയ്യാതെ ഭാര്യ മക്കള്‍ക്ക് വിഷം കൊടുത്ത ശേഷം സ്വയം വിഷം കഴിച്ചു. ജീവന്‍ ഒടുക്കാന്‍ ശ്രമിച്ച വീട്ടമ്മ ചികിത്സയില്‍ കഴിയവെ മരിച്ചു. കുടുംബ പ്രശ്‌നമാണ് കാരണം. പോരുവഴി അമ്പലത്തുംഭാഗം മേലൂട്ട് പടിഞ്ഞാറെ കോളനി ശ്രീജിത്ത് ഭവനത്തില്‍ അനില്‍കുമാറിന്റെ ഭാര്യ ശ്രീജിത എന്ന 31 കാരിയാണ് മരിച്ചത്. വണ്ടാനം മെഡിക്കല്‍ കോളജില്‍ ഇന്നലെ വൈകുന്നേരം നാല് മണിയോടെയാണ് മരണം സംഭവിച്ചത്.

ശ്രീജിത മക്കളായ ഒമ്പത് വയസുകാരന്‍ അനുജിത്ത് ആറ് വയസുകാരിയായ അനുജിത എന്നിവര്‍ക്ക് വിഷം നല്‍കിയ ശേഷം സ്വയം വിഷം കഴിക്കുകയായിരുന്നു. അനുജിതയുടെ നില അതീവ ഗുരുതരമായി തുടരുകയാണ്. ഭര്‍ത്താന് അനില്‍ കുമാറും ശ്രീജിതയും തമ്മില്‍ മദ്യപാനത്തെ ചൊല്ലി സ്ഥിരമായി കലഹിച്ചിരുന്നു.

മക്കള്‍ക്ക് വിഷം നല്‍കി താന്‍ വിഷം കഴിക്കുന്നതിന്റെ ചിത്രങ്ങള്‍ ശ്രീജിത ബന്ധുക്കള്‍ക്ക് വാട്‌സാപ്പ് സന്ദേശമായി അയച്ചു കൊടുത്തു. ഇതുകണ്ട് അടുത്ത ബന്ധു ഇവരെ തേടി എത്തുകയായിരുന്നു. ഈ സമയം അനില്‍ കുമാര്‍ മദ്യപിച്ച് ബോധരഹിതനായി വീട്ടില്‍ കിടക്കുന്നുണ്ടായിരുന്നു. അവശനിലയിലായ ശ്രീജിതയെയും മക്കളെയും ഉടന്‍ തന്നെ ശാസ്താംകോട്ട താലൂക്ക് ആശുപത്രിയില്‍ എത്തിക്കുകയും പിന്നീട് വണ്ടാനം മെഡിക്കല്‍ കോളേജിലേക്ക് മാറ്റുകയും ചെയ്തു. അനുജിത ഗുരുതരാവസ്ഥയില്‍ തുടരുകയാണ്. അനുജിത്ത് അപകടനില തരണം ചെയ്തതായി ബന്ധുക്കള്‍ പറഞ്ഞു.