ബൈക്കിന് കുറുകെ നായ ചാടി; തിരുവനന്തപുരത്ത് യുവാവിന് ദാരുണാന്ത്യം

തിരുവനന്തപുരത്ത് ബൈക്കിന് കുറുകെ നായ ചാടിയുണ്ടായ അപകടത്തില്‍ യുവാവ് മരിച്ചു. കുന്നത്തുകാല്‍ സ്വദേശി അജിന്‍ എ എസ് ആണ് മരിച്ചത്. തലച്ചോറിന് പരിക്കേറ്റ് കാരക്കോണം മെഡിക്കല്‍ കോളേജില്‍ ചികിത്സയിലായിരുന്നു. അരുവിയോട് ജങ്ഷനില്‍ വെള്ളിയാഴ്ചയായിരുന്നു അപകടം.

വെള്ളിയാഴ്ചയാണ് അജിന് അപകടം സംഭവിച്ചത് . വൈകിട്ട് ആറുമണിക്കാണ് അപകടം ഉണ്ടായത്. അജിൻ സഞ്ചരിച്ച ബൈക്കിന് മുന്നിൽ പോയ ബൈക്കിന് കുറുകേ നായ ചാടി. ഇതോടെ മുന്നേ പോയ ബൈക്ക് വീണു. ഈ ബൈക്കിൽ ഇടിച്ച് അജിനും ബൈക്കും തെറിച്ചു വീണു. ഗുരുതര പരിക്ക് പറ്റിയ അജിനെ കാരക്കോണം മെഡിക്കൽ കോളജ് ആശുപത്രിയിൽ പ്രവേശിപ്പിച്ചു , ശസ്ത്രക്രിയ അടക്കം നടത്തിയെങ്കിലും അജിന്‍റെ ജീവൻ രക്ഷിക്കാനായില്ല . ഭാര്യ: നീതു, മകൾ: യുവാന.

ഇതിനിടെ തിരുവനന്തപുരത്ത് വീണ്ടും തെരുവുനായയുടെ ആക്രമണം റിപ്പോര്‍ട്ട് ചെയ്തു. നാഷണല്‍ ക്ലബ് ജീവനക്കാരനായ ശ്രീനിവാസനെ നായ കടിച്ചു. ബൈക്കിന്റെ പിന്നിലിരുന്ന ശ്രീനിവാസനെ പിന്തുടര്‍ന്ന് കടിക്കുകയായിരുന്നു. ഇയാളുടെ കാലില്‍ ആഴത്തില്‍ മുറിവേറ്റിറ്റുണ്ട്. ആദ്യം ജനറല്‍ ആശുപത്രിയിലാക്കിയ ഇയാളെ മെഡിക്കല്‍ കോളേജിലേക്ക് മാറ്റി. സ്റ്റാച്യു ഊറ്റുകുഴിയിലായിരുന്നു സംഭവം.