പട്ടാമ്പിയിൽ അമ്മയെയും ഭാര്യയെയും മകളെയും കുത്തിയ ശേഷം യുവാവ് ജീവനൊടുക്കാൻ ശ്രമിച്ചു

പട്ടാമ്പി കിഴായൂരിൽ അമ്മയെയും ഭാര്യയെയും മകളെയും കുത്തിയ ശേഷം യുവാവ് ജീവനൊടുക്കാൻ ശ്രമിച്ചു. മേലെ പട്ടാമ്പി സ്വദേശി സജീവനാണ് ഭാര്യ ആതിര, അമ്മ സരോജിനി, മകള്‍ പൊന്നു എന്നിവരെ കുത്തി പരിക്കേൽപ്പിച്ചത്. ഗുരുതരമായി പരിക്കേറ്റ സജീവനെ വെന്റിലേറ്ററിൽ പ്രവേശിപ്പിച്ചു. കുത്തേറ്റ ഭാര്യയുടെ നിലയും ഗുരുതരമാണ്.

പ്രകോപനമൊന്നുമില്ലാതെ സജീവൻ കൈയിൽ കിട്ടിയ കത്തികൊണ്ട് ഭാര്യയെയും അമ്മയെയും മകളെയും കുത്തിപ്പരിക്കേൽപ്പിക്കുകയായിരുന്നു.

തെങ്ങുകയറ്റതൊഴിലാളിയായ സജീവന് മാനസിക വിഭ്രാന്തിയുണ്ടായിരുന്നതായും പൊലീസ് പറയുന്നു.

ഭാര്യക്ക് കഴുത്തിനും വയറിനുമാണ് പരിക്കേറ്റത്. ഇവരെ കുത്തിയ ശേഷം സ്വയം കഴുത്തിന് കുത്തിയാണ് സജീവൻ ജീവനൊടുക്കാൻ ശ്രമിച്ചത്. മകളുടെയും അമ്മയുടെയും പരിക്ക് ഗുരുതരമല്ല.