കറന്റ് പോയതിൽ പ്രതിഷേധം, കെഎസ്ഇബി ഓഫീസ് ആക്രമിച്ചെന്ന് പരാതിസാം, സംഭവം കോഴിക്കോട്

കോഴിക്കോട് : കറന്റ് പോയതിൽ നാട്ടുകാർ കെഎസ്ഇബി ഓഫീസ് ആക്രമിച്ചെന്ന് പരാതി. പന്തീരാങ്കാവിൽ കഴിഞ്ഞ ദിവസം രാത്രിയാണ് സംഭവം. വൈദ്യുതി നിലച്ചതിനെ തുടർന്ന് ഒരു സംഘം ആളുകൾ കെഎസ്ഇബി സെക്ഷൻ ഓഫീസിലെത്തി നാശനഷ്ടം വരുത്തിയെന്നാണ് ആരോപണം. അസഹനീയമായ ചൂടിനിടെ വൈദ്യുതി നിലച്ചതാണ്‌ കാരണമായി പറയുന്നത്.

ഇതിനു പിന്നാലെ ഒരു കൂട്ടം ആളുകൾ സംഘടിച്ചെത്തി സെക്ഷൻ ഓഫീസ് ആക്രമിക്കുകയായിരുന്നു. ആക്രമണത്തിൽ ഓഫീസിന്റെ ബോർഡിന് കേടുപാടുകൾ സംഭവിച്ചു. ഈ സമയം ഒരു ഓവർസിയർ മാത്രമാണ് ഓഫീസിൽ ഉണ്ടായിരുന്നത്. ജീവനക്കാരുടെ അനാസ്ഥ കാരണമാണ് ഈ പ്രദേശത്തെ വൈദ്യുതി പോകുന്നതെന്നാണ് നാട്ടുകാരുടെ ആരോപണം.

അമിതമായ ഉപഭോഗമുണ്ടായാൽ വൈദ്യുതി വൈദ്യുതി തടസപ്പെടുമെന്നും, അതിനാൽ 8 ട്രാൻസ്ഫോമറുകൾ ഓഫാക്കണമെന്ന് കൺട്രോൾ റൂമിൽ നിന്നും കൃത്യമായ നിർദേശമുണ്ടായിരുന്നുവെന്നും ജീവനക്കാർ പറയുന്നു. മുകളിൽ നിന്നുള്ള ഉത്തരവ് തങ്ങൾ പാലിക്കുക മാത്രമാണ് ചെയ്തത്. എന്നാൽ ഇത് തെറ്റിദ്ധരിച്ച് ഒരു സംഘം ആളുകൾ വൈദ്യുതി നിലച്ചതിൽ തങ്ങളെ പഴിചാരുകയും ഓഫീസ് ആക്രമിക്കുകയുമായിരുന്നു