പ്രധാനമന്ത്രിയുടെ പ്രസ്താവനയെ വളച്ചൊടിക്കുന്നു: കേന്ദ്രസര്‍ക്കാര്‍

വെള്ളിയാഴ്ച നടന്ന സര്‍വകക്ഷി യോഗത്തില്‍ പ്രധാനമന്ത്രി നടത്തിയ പ്രസ്താവനയെ തെറ്റായി അവതരിപ്പിക്കാനുള്ള ബോധപൂര്‍വമായ ശ്രമം നടക്കുന്നതായി കേന്ദ്ര സര്‍ക്കാര്‍. പ്രധാനമന്ത്രിയുടെ പ്രസ്താവന വിവാദമായതിനെ തുടര്‍ന്ന് വാര്‍ത്താ കുറിപ്പിലാണ് കേന്ദ്രം നിലപാട് വ്യക്തമാക്കിയത്.

നിയന്ത്രണ രേഖയില്‍ നടക്കുന്ന ഏത് കൈയേറ്റത്തെയും ശക്തമായി നേരിടുമെന്ന് പ്രധാനമന്ത്രി വ്യക്തമാക്കിയതാണെന്ന് വാര്‍ത്താക്കുറിപ്പില്‍ വ്യക്തമാക്കി. . നിയന്ത്രണ രേഖയില്‍ നടന്ന കൈയേറ്റങ്ങളെ മുന്‍പ് അവഗണിച്ചതുപൊലെയല്ല ഇപ്പോള്‍ ശക്തമായി നേരിടുന്നുണ്ടെന്ന കാര്യമാണ് പ്രധാനമന്ത്രി വ്യക്തമാക്കിയതെന്നും കേന്ദ്ര സര്‍ക്കാര്‍ വ്യക്തമാക്കി. നിയന്ത്രണ രേഖയ്ക്ക് ഇപ്പുറത്ത് നിര്‍മ്മാണങ്ങള്‍ നടത്താന്‍ ചൈന ശ്രമിച്ചതാണ് ജൂണ്‍ 15 ന്റെ പ്രശ്‌നങ്ങള്‍ക്ക് കാരണമെന്ന കാര്യവും സര്‍വകക്ഷി യോഗത്തില്‍ വ്യക്തമാക്കിയിരുന്നു.

സൈനികരുടെ ധീരതയുടെ ഫലമായിട്ടാണ് ഇന്ത്യയുടെ ഭൂമിയില്‍ ചൈനക്കാരുടെ സാന്നിധ്യം ഇല്ലെന്ന് പ്രധാനമന്ത്രി പറഞ്ഞത്. ചൈനീസ് സൈനികരുടെ നീക്കം തടഞ്ഞത് 16 ബീഹാര്‍ റെജിമെന്റിലെ സൈനികരാണ്. ഇന്ത്യയുടെ അതിരുകള്‍ ഏതാണെന്ന് ഭൂപടങ്ങളില്‍നിന്ന് വ്യക്തമാണ്. അക്കാര്യത്തില്‍ കേന്ദ്ര സര്‍ക്കാര്‍ പ്രതിജ്ഞാബന്ധമാണ്. കഴിഞ്ഞ 60 വര്‍ഷത്തിനിടയില്‍ 43000 ചതുരശ്ര കിലോമീറ്റര്‍ എങ്ങനെയാണ് ചൈനയ്ക്ക് നഷ്ടപെടുത്തിയ സാഹചര്യം രാജ്യത്തിന് അറിയാവുന്നതാണ്. നിയന്ത്രണ രേഖയില്‍ ഒരു മാറ്റവും വരുത്താന്‍ അനുവദിക്കില്ലെന്നും വാര്‍ത്താകുറിപ്പില്‍ കേന്ദ്ര സര്‍ക്കാര്‍ വ്യക്തമാക്കി.