ആദ്യം എഴുന്നേറ്റുനിന്നത് ബൽറാം, പിന്നാലെവ മുദ്രാവാക്യം വിളി തുടങ്ങി, ശേഷം മൈക്കും ഓഫായി, ദുരൂഹത ആരോപിച്ച് എ. കെ. ബാലൻ

തിരുവനന്തപുരം: ഉമ്മൻ ചാണ്ടിയുടെ അനുസ്മരണ യോഗത്തിൽ മുഖ്യമന്ത്രി പിണറായി വിജയൻ സംസാരിക്കവേ മൈക്ക് ഓഫായ സംഭവത്തിൽ കോൺഗ്രസ് നേതാക്കളെ സംശയത്തിന്റെ നിഴലിൽ നിർത്തി സി.പി.എം. നേതാവ് എ.കെ. ബാലൻ. വേദിയിൽ നടന്ന സംഭവങ്ങൾ കൂട്ടി വായിക്കുമ്പോൾ പന്തികേടുണ്ടെന്നും എ.കെ. ബാലൻ പ്രതികരിച്ചു. മുഖ്യമന്ത്രി സംസാരിക്കുമ്പോൾ ബൽറാം എണീറ്റുനിന്നു പിന്നാലെയാണ് മൈക്ക് ഓഫായത്.

പരിപാടിയിലേക്ക് മുഖ്യമന്ത്രിയെ ക്ഷണിച്ചതിൽ കോൺഗ്രസിലെ തന്നെ ഒരു വിഭാഗത്തിന് അമർഷം ഉണ്ടായിരുന്നതായി വാർത്തകളുണ്ടായിരുന്നു. ഒപ്പം മുഖ്യമന്ത്രി സംസാരിക്കുന്ന സമയത്ത് മുദ്രാവാക്യം വിളിയും ഉണ്ടായി. മുദ്രാവാക്യം നീണ്ടുനിൽക്കുന്ന സ്ഥിതിയുണ്ടായി. സ്റ്റേജിന്റെ പിന്നിൽനിന്ന് ആദ്യം എഴുന്നേറ്റുനിൽക്കുന്നത് ബൽറാം ആണ്. ഇരിക്കണമെന്ന് ആംഗ്യം കാണിക്കുന്നുണ്ട്. പിന്നാലെ കെ.പി.സി.സി. പ്രസിഡന്റും നിന്നു. ഇതിനെത്തുടർന്നാണ് മൈക്ക് ഓഫ് ആക്കുന്ന സ്ഥിതിവരുന്നത്.

ഇതെല്ലാം കൂട്ടിവായിക്കുന്ന സമയത്ത് എന്തോ ഒരു പന്തികേടുണ്ട് എന്ന് സാധാരണഗതിയിൽ തോന്നും. ഇതുമായി ബന്ധപ്പെട്ട സത്യാവസ്ഥ വ്യക്തമാക്കേണ്ടത് കോൺഗ്രസാണ്’, എ.കെ. ബാലൻ പറഞ്ഞു. ‘തിരഞ്ഞെടുപ്പുമായി ബന്ധപ്പെട്ട് എൽ.ഡി.എഫിന്റെ പിന്തുണ വേണമെന്ന് പറഞ്ഞത് യാതൊരു ലജ്ജയുമില്ലാതെയാണല്ലോ.

യു.ഡി.എഫിന്റെ ഒരാളെ എൽ.ഡി.എഫ് പിന്തുണച്ച് വിജയിപ്പിക്കാൻ തയ്യാറാകില്ലെന്ന് എല്ലാവർക്കും അറിയാം. എന്നിട്ടും കെ.പി.സി.സി. പ്രസിഡന്റ് ജനങ്ങൾക്ക് മുമ്പിൽ അനാവശ്യമായ വിവാദം ഉണ്ടാക്കിഎന്നും എ കെ ബാലൻ പറയുകയുണ്ടായി.കെ.പി.സി.സി. പ്രസിഡന്റിനെതിരായ പരാതി, വി.ഡി. സതീശനെതിരായ പരാതികളൊക്കെ കോൺഗ്രസ് നേതാക്കളാണ് നൽകിയത്.

ഇവരുതന്നെ പരാതി നൽകി ഓരോരുത്തരെയായി ഇവർ തന്നെ പുകച്ചു ചാടിക്കുകയാണ്. കരുണാകരൻ പുറത്തുപോകാനും എ.കെ. ആന്റണി, വി.എം. സുധീരൻ, മുല്ലപ്പള്ളി രാമചന്ദ്രൻ തുടങ്ങിയവർ രാജിവെക്കാനും കാരണമെന്തായിരുന്നുവെന്നും അദ്ദേഹം ചോദിക്കുകയുണ്ടായി.