ഇനി ഗുരുവായൂര്‍ ക്ഷേത്രത്തില്‍നിന്ന് ചോറൂണിന്റെയും തുലാഭാരത്തിന്റെയും ഫോട്ടോയെടുക്കാം

ഗുരുവായൂര്‍ ക്ഷേത്ര നടയില്‍ വെച്ച് ഇനി നിങ്ങളുടെ കുഞ്ഞിന്റെ ചോറൂണിന്റെ ഫോട്ടോകള്‍ എടുക്കാം. ചോറൂണിന്റെയും തുലാഭാരത്തിന്റെയും ഫോട്ടോയെടുക്കാന്‍ ഉത്തരവായി. നാളെ മുതല്‍ ഫോട്ടോ എടുക്കാം.

ക്ഷേത്രം ഭാരവാഹികള്‍ നിയമിക്കുന്നവരാണ് ഫോട്ടോ എടുത്തു തരിക. ഇതിനായി ഏഴുപേരെ നിയമിച്ചു. ചടങ്ങുകള്‍ പൂര്‍ത്തിയാകുമ്പോള്‍ തന്നെ എടുത്ത ഫോട്ടോയും തയ്യാറാകും. ഇതിനായി കംപ്യുട്ടറുകളും പ്രിന്റിങ് മെഷീനുകളും സ്ഥാപിച്ചു.

ചോറൂണിന്റെ ഫോട്ടോയെടുക്കുന്ന ചടങ്ങിന്റെ ഉദ്ഘാടനം ദേവസ്വം മന്ത്രി കടകംപള്ളി സുരേന്ദ്രന്‍ ശനിയാഴ്ച രാവിലെ നിര്‍വഹിക്കും.സ്വകാര്യ വ്യക്തികള്‍ കരാറെടുത്ത് നടത്തിയിരുന്ന ക്ഷേത്രത്തിലെ ഫോട്ടോഗ്രാഫി അഞ്ച് വര്‍ഷം മുമ്പാണ് നിന്ന് പോയത്. 2014ല്‍ രണ്ട് കോടി 18 ലക്ഷം രൂപക്കായിരുന്നു സ്വകാര്യ വ്യക്തി ഫോട്ടോയെടുക്കല്‍ ഒരു വര്‍ഷത്തേക്ക് കരാറെടുത്തിരുന്നത്.

ഇത് സര്‍വ്വകാല റെക്കോഡായിരുന്നു. പിന്നീട് ടിവി ചന്ദ്രമോഹന്‍ ചെയര്‍മാനായിരുന്ന ഭരണസമതിയും കരാറുകാരനും തമ്മിലുള്ള വൈരാഗ്യം കോടതിയിലെത്തി. കോടതി ഇടപെടലിനെ തുടര്‍ന്ന് പിന്നീട് ചോറൂണും തുലാഭാരവും ഫോട്ടോയെടുക്കാറുണ്ടായിരുന്നില്ല.