സെല്‍ഫിയെടുക്കവേ കടലില്‍ വീണ തീര്‍ത്ഥാടകസംഘത്തിലെ യുവാവ്  മരിച്ചു

വിഴിഞ്ഞം: സെല്‍ഫിയെടുക്കവേ ആഴിമലത്തീരത്തെ പാറക്കെട്ടില്‍ നിന്ന് കടലില്‍ വീണ തീര്‍ത്ഥാടകസംഘത്തിലെ യുവാവ്  മരിച്ചു. പുനലൂര്‍ ഇളമ്പല്‍ ആരംപുന്ന ജ്യോതിഷ് ഭവനില്‍ ജ്യോതിഷ് എസ്.(24) ആണ് മരിച്ചത്. ഞായറാഴ്ച വൈകീട്ട് 3.45-ഓടെയായിരുന്നു അപകടം.

ആഴിമല ശിവക്ഷേത്രദര്‍ശനത്തിനുശേഷം ജ്യോതിഷും സംഘവും കടല്‍ത്തീരത്തേക്കു പോകാന്‍ താഴത്തെ പാറക്കെട്ടുകളിലെത്തുകയായിരുന്നു. അപകടമേഖലയായതിനാല്‍ ഇവിടെ സ്ഥാപിച്ച നിയന്ത്രണ ബോര്‍ഡുകളിലെ മുന്നറിയിപ്പുകള്‍ അവഗണിച്ചായിരുന്നു സംഘം ഇവിടെ എത്തിയത്. സെല്‍ഫിയെടുക്കുന്നതിനിടെ ജ്യോതിഷ് നിന്നിരുന്ന പാറക്കെട്ടുകളിലേക്ക് തിരമാല അടിച്ചുകയറുകയും തുടർന്ന് കടലില്‍ വഴുതി വീണ ജ്യോതിഷിനെ കാണാതാവുകയും ചെയ്‌തു.

സംഭവം കണ്ട സുഹൃത്തുകളും ഒപ്പമെത്തിയ സ്ത്രീകളും നിലവിളിച്ചതോടെയാണ് ലൈഫ് ഗാര്‍ഡുൾപ്പെടെയുള്ളവര്‍ വിവരമറിയുന്നത്. ഉടനെ വിഴിഞ്ഞം തീരദേശ പോലീസ് സ്റ്റേഷനില്‍ വിവരമറിയിക്കുകയായിരുന്നു.തുടർന്ന് പോലീസിന്റെ പട്രോളിങ് ബോട്ടുപയോഗിച്ചു നടത്തിയ തിരച്ചിലില്‍ അടിമലത്തുറ ഫാത്തിമമാത പള്ളിക്കു സമീപത്തെ കടലില്‍ ഒഴുകിപ്പോകുന്ന കണ്ട യുവാവിനെ വടമുപയോഗിച്ച്  ബോട്ടിലേക്കു വലിച്ചുകയറ്റിയപ്പോഴേക്കും മരിച്ചിരുന്നു.