രോഗിയായ യജമാനനേയും കാത്ത് ആശുപത്രിപ്പടിക്കല്‍ നായ; ഒടുവില്‍ വീണ്ടും കണ്ടപ്പോള്‍ കണ്ണ് നിറയ്ക്കുന്ന സ്‌നേഹപ്രകടനം

സ്നേഹം കൊണ്ട് മനുഷ്യരില്‍ അത്ഭുതം സ്രഷ്ടിക്കുന്നവരാണ് ശ്വാനവര്‍ഗം. മനുഷ്യരോട് വളരെയധികം വിശ്വസ്തതയും സ്‌നേഹവും കാത്തു സൂക്ഷിക്കുന്ന ഇവരുടെ കഥകള്‍ നമ്മള്‍ കേട്ടിട്ടുണ്ട്. ചികിത്സയ്ക്കായി ആശുപത്രിയി്ല്‍ കഴിയുന്ന യജമാനനേയും കാത്ത് ആശുപത്രിക്കു മുന്നില്‍ കാത്തിരുന്ന നായയുടെ കഥയാണ് ഇപ്പോള്‍ വൈറല്‍ ആയിരിക്കുന്നത്.

തുര്‍ക്കിയില്‍ നിന്നാണ് മനസിനെ സന്തോഷിപ്പിക്കുന്ന ഈ വാര്‍ത്ത വരുന്നത്. ട്രാബ്‌സോണിലെ ബോണ്‍കക്ക് എന്ന പെണ്‍നായ ആണ് തന്റെ 68 കാരന്‍ ഉടമയ്ക്കായി ആശുപത്രിയില്‍ ഒരാഴ്ചയോളം കാത്തിരുന്നത്. നായയുടെ കാത്തിരിപ്പിന്റെയും ഉടമയെ കാണുമ്പോഴുണ്ടാകുന്ന സന്തോഷത്തിന്റെയും വിഡിയോ സമൂഹ മാധ്യമങ്ങളില്‍ പ്രചരിക്കുന്നുണ്ട്.

ഈ മാസം 14നാണ് ബോണ്‍കക്കിന്റെ ഉടമ സെമല്‍ സെന്‍ടര്‍ക്കിനെ തലച്ചോറിലെ തകരാറിനെ തുടര്‍ന്ന് ആശുപത്രിയില്‍ അഡ്മിറ്റ് ചെയ്തത്. അദ്ദേഹത്തെ കൊണ്ടുപോയ ആംബുലന്‍സിനെ പിന്തുടര്‍ന്നു വന്ന സ്‌നേഹ സമ്പന്നയായ നായ പിന്നീട് ആ കാത്തിരിക്കല്‍ തുടര്‍ന്നു. എല്ലാ ദിവസവും ബോണ്‍കക്ക് ആശുപത്രിക്ക് മുന്നിലുണ്ടാകും. പിന്നീട് ആശുപത്രിയിലെ ആളുകള്‍ ഇവള്‍ക്ക് ഭക്ഷണവും നല്‍കാന്‍ തുടങ്ങി.

പല പ്രാവശ്യം നായയെ വീട്ടിലേക്ക് കൊണ്ടുപോയെങ്കിലും നായ ആശുപത്രിയിലേക്ക് തിരിച്ചെത്തുകയായിരുന്നു. നായയും, ഉടമയും തമ്മിലുള്ള ബന്ധം അറിഞ്ഞ ആളുകൾക്ക് ഒത്തിരി സന്തോഷമായെന്നു, ആശുപത്രി അധികൃതര്‍ തദ്ദേശ മാധ്യമങ്ങളോട് പറഞ്ഞു. പിന്നീട് ആശുപത്രിയില്‍ നിന്ന് വിട്ടപ്പോഴാണ് ഇരുവരും തമ്മില്‍ കണ്ടുമുട്ടിയത്.