100 അടി ഉയരത്തിൽനിന്നു വീഴാൻ പോയ കുഞ്ഞിനെ സാഹസികമായി രക്ഷിച്ച് യുവാവ്

കസാഖിസ്ഥാൻ തലസ്ഥാനമായ നൂർ സുൽത്താനിൽ 100 അടി ഉയരത്തിൽനിന്നു വീഴാൻ പോയ മൂന്നു വയസ്സുകാരിയെ സാഹസികമായി രക്ഷിച്ച് യുവാവ്. അമ്മ സാധനങ്ങൾ വാങ്ങാൻ പുറത്തുപോയ സമയത്താണ് കുട്ടിക്ക് അപകടമുണ്ടായത്. ജനൽപാളിയിലേക്കു വലിഞ്ഞു കയറിയ കുട്ടി പുറത്തേക്ക് എത്തുകയും കെട്ടിടത്തിന്റെ എട്ടാം നിലയിലെ ജനൽക്കമ്പിയിൽ തൂങ്ങി നിൽക്കുകയും ചെയ്‌തു.

സാബിത് ഷോൺതാക്ബേവ് എന്നയാൾ ജോലി കഴിഞ്ഞ് തിരികെ വരുമ്പോൾ ആളുകൾ കൂടിനിൽക്കുന്നതും കണ്ട് നോക്കിയപ്പോഴാണ് ഈ ഭയപ്പെടുത്തുന്ന കാഴ്ച കണ്ടത്. തുടർന്ന് പെൺകുഞ്ഞിനെ രക്ഷിക്കാൻ സാബിത് ശ്രമം നടത്തി.

കുട്ടിയുടെ ഫ്ലാറ്റിനു തൊട്ടു താഴെയുള്ള നിലയിലെ ജനൽവഴി പുറത്തിറങ്ങിയ സാബിത് ഒരു കൈ ജനൽക്കമ്പികളിൽ പിടിച്ച് മറ്റേക്കയ്യിൽ കുട്ടിയെ ചേർത്തു പിടിച്ചു. തുടർന്ന് മുറിക്കുള്ളിൽ നിന്ന ആൾക്ക് കുട്ടിയെ കൈമാറി. സാബിത്തിന്റ സമയോചിതമായി ഇടപെടലിനും കുട്ടിയുടെ ജീവൻ രക്ഷിച്ചതിനും കസാഖ്സ്ഥാൻ മന്ത്രാലയം അദ്ദേഹത്തെ അഭിനന്ദിച്ചു.