ന്യൂ ഇയര്‍ ആഘോഷത്തിനിടെ കൊച്ചിയില്‍ വിദേശ വനിതയെ അപമാനിച്ചു

കൊച്ചി: ലോകം മുഴുവന്‍ പുതുവത്സരം ആഘോഷിക്കുമ്പോള്‍ കേരളത്തില്‍ നിന്നൊരു അശുഭ വാര്‍ത്ത. വിദേശ വനിതയ്ക്ക് നേരെ പുതുവര്‍ഷ ആഘോഷത്തിന് ഇടെ അതിക്രമവും അപമാനിക്കുകയും ചെയ്തതായി പരാതി. കൊച്ചി ലില്ലി സ്ട്രീറ്റില്‍ വെച്ചാണ് സംഭവം ഉണ്ടായത്. പപ്പാഞ്ഞയെ കത്തിച്ച ശേഷം തിരികെ മടങ്ങുമ്പോഴാണ് വിദേശ വനിതയ്ക്ക് നേരെ അപമാന ശ്രമം ഉണ്ടായത്. ബന്ധധുവിനൊപ്പം ആയിരുന്ന വിദേശ വനിത ഒടുവില്‍ കരഞ്ഞു കൊണ്ടാണ് മടങ്ങി പോയത്.

ഫോര്‍ട്ടു കൊച്ചിയില്‍ പതിനായിരങ്ങളാണ് പുതുവത്സരത്തെ വരവേല്‍ക്കാന്‍ ആയി എത്തിയത്. കൊച്ചി തുറമുഖത്ത് വിരുന്നെത്തിയ കപ്പലുകളില്‍നിന്ന് പുതുവര്‍ഷപ്പിറവി അറിയിച്ചുള്ള സൈറണുകള്‍ മുഴങ്ങി. ഇതോടെ പരേഡ് ഗ്രൗണ്ടില്‍ സജ്ജമാക്കിയ പപ്പാഞ്ഞിക്ക് തീ കൊളുത്തുക ആയിരുന്നു. ഇതോടൊപ്പം പാതയോരങ്ങളില്‍ ഒരുക്കിനിര്‍ത്തിയ പപ്പാഞ്ഞികള്‍ തീയില്‍ ജ്വലിച്ചു.

ലോകത്തിന്റെ വിവിധ ഭാഗങ്ങളില്‍ നിന്നെത്തിയ വിനോദ സഞ്ചാരികളും നാട്ടുകാരും വൈവിധ്യങ്ങള്‍ക്കിടയിലും ഒരുമയുടെ സന്ദേശം പകര്‍ന്ന് പരസ്പരം കൈകൊടുത്തും ആലിംഗനംചെയ്തും ആശംസ നേര്‍ന്നു. മധുര പലഹാരങ്ങള്‍ പങ്കുവച്ച് പ്രതീക്ഷയുടെ പുതുവര്‍ഷത്തെ ആവേശപൂര്‍വം വരവേല്‍ക്കുന്നതാണ് കണാനായത്.

സംസ്ഥാനത്ത് കൊച്ചിയിലും കോഴിക്കോടും തിരുവന്തപുരത്തും വമ്പിച്ച ആഘോഷപരിപാടികള്‍ അരങ്ങേറി. ഫോര്‍ട്ട് കൊച്ചിയില്‍ സംഗീതവും നൃത്തവും കൂടിക്കലര്‍ന്ന പുതുവര്‍ഷാഘോഷത്തില്‍ ആയിരക്കണക്കിന് ആളുകളാണ് പങ്കെടുത്തത്. പോയവര്‍ഷത്തിന്റെ പ്രതീകമായ പാപ്പാഞ്ഞിക്ക് തീകൊളുത്തി. ഇത്തവണ ഗ്രീന്‍ പ്രോട്ടോക്കോള്‍ പാലിച്ചു കൊണ്ടാണ് ഫോര്‍ട്ട് കൊച്ചിയിലെ പുതുവര്‍ഷാഘോഷങ്ങള്‍ നടന്നത്. വന്‍സുരക്ഷയും ഒരുക്കിയിരുന്നു.

തിരുവനന്തപുരത്ത് കോവളം ബീച്ചിലും കോഴിക്കോട് ബീച്ച് പരിസരത്തും പുതുവര്‍ഷാഘോഷങ്ങള്‍ നടന്നു. അനിഷ്ടസംഭവങ്ങള്‍ ഒഴിവാക്കാന്‍ പൊലീസ് നിയന്ത്രണങ്ങളുമേര്‍പ്പെടുത്തിയിട്ടുണ്ട്.

പുതുവര്‍ഷത്തെ ആദ്യം വരവേറ്റത് ന്യൂസിലന്‍ഡ്. ഇന്ത്യന്‍സമയം വൈകിട്ട് നാലരയ്ക്കായിരുന്നു ഓക്‌ലന്‍ഡിലെ നവവല്‍സരാഘോഷം.നഗരഹൃദയത്തിലെ സ്‌കൈ ടവറില്‍ കരിമരുന്ന് കലാപ്രകടനത്തോടെയാണ് പുതുവര്‍ഷത്തെ വരവേറ്റത് .