മുഖ്യമന്ത്രിയുടെ വിരുന്നിൽ ലോകായുക്ത പങ്കെടുത്തു; ജുഡീഷ്യറിയിലുള്ള വിശ്വാസം നഷ്ടപ്പെട്ടു

തിരുവനന്തപുരം. മുഖ്യമന്ത്രിയുടെ ദുരിതാശ്വാസ നിധി ദുരുപയോഗ കേസ് ഫുള്‍ ബെഞ്ചിലേക്ക് മാറ്റിയ ലോകായുക്ത ജഡ്ജിമാര്‍ മുഖ്യയുടെ ഇഫ്താര്‍ വിരുന്നില്‍ പങ്കെടുത്തുവെന്ന ആരോപണത്തില്‍ പ്രതികരണവുമായി കേസിലെ ഹര്‍ജിക്കാരന്‍. ഹര്‍ജിക്കാരന്‍ എന്ന നിലയില്‍ തനിക്ക് ജുഡീഷ്യറിയിലുള്ള വിശ്വാസം നഷ്ടപ്പെട്ടതായി ആര്‍എസ് ശശികുമാര്‍ പ്രതികരിച്ചു. കേസില്‍ ന്യായന്യായങ്ങള്‍ പറയാതെയാണ് ലോകായുക്ത ഫുള്‍ ബെഞ്ചിലേക്ക് കേസ് വിട്ടത്.

കഴിഞ്ഞ ചുവ്വാഴ്ചയാണ് ലോകായുക്തയും ഉപലോകായുക്തയും മുഖ്യമന്ത്രി സംഘടിപ്പിച്ച ഇഫ്താര്‍ വിരുന്നില്‍ പങ്കെടുത്തത്. എന്നാല്‍ സര്‍ക്കാര്‍ പുറത്തിറക്കിയ വാര്‍ത്താക്കുറിപ്പിലും ലോകയുക്തയുടെ പേരുണ്ടായിരുന്നില്ല. കേസില്‍ മുഖ്യമന്ത്രി പിണറായി വിജയന് ആശ്വാസം നല്‍കിയ വിധി മാര്‍ച്ച് 31നാണ് ഉണ്ടായത്. വിരുന്നിലേക്ക് ലോകായുക്തയെയും ഉപലോകായുക്തയെയും ലക്ഷണിച്ചുവെന്നും അവര്‍ പങ്കെടുത്തുവെന്നുമാണ് ആരോപണം.

ജുഡീഷ്യറിയെ അവഹേളിക്കുന്ന നടപടിയാണ് പരിപാടിയില്‍ ലോകായുക്തതയും ഉപലോകായുക്തയും പങ്കെടുത്തതിലൂടെ സംഭവിച്ചിരിക്കുന്നതെന്ന് ഹര്‍ജിക്കാരന്‍ പറഞ്ഞു. ഈ നടപടി ജുഡീഷ്യറിയിലുള്ള വിശ്വാസം നഷ്ടപ്പെടുവാന്‍ മാത്രമാണ് കാരണമായത്. മുഖ്യമന്ത്രി പിണറായി വിജയന് അനുകൂലമായി നടപടി സ്വീകരിച്ചതിന്റെ നന്ദി സൂചകമായിട്ടാണ് ഇരുവരെയും ക്ഷണിച്ചത്. ക്ഷണിച്ചാല്‍ പോലും പരിപാടിയില്‍ നിന്നും വിട്ട് നില്‍ക്കണമായിരുന്നുവെന്നും ഹര്‍ജിക്കാരന്‍ പറയുന്നു.