കാറും ലോറിയും കൂട്ടിയിടിച്ച് തീപിടിച്ചു; വൻ അപകടം ഒഴിവായത് തലനാരിഴയ്ക്ക്

ആലപ്പുഴ: ദേശീയപാതയില്‍ ചന്തിരൂര്‍ ഭാഗത്ത് കാറും ലോറിയും കൂട്ടിയിടിച്ച് തീപിടിച്ചു. അരൂരിൽ ഞായറാഴ്ച രാത്രി പതിനൊന്നരയോടെയാണ് അപകടമുണ്ടായത്. സംഭവം നടന്ന സ്ഥലത്തിന് തൊട്ടടുത്തുള്ള വര്‍ക്ക്‌ഷോപ്പില്‍ നിന്ന് മിനി ലോറി റോഡിലേക്ക് ഇറങ്ങവെയാണ് അപകടം. എറണാകുളം ഭാഗത്തുനിന്നും ആലപ്പുഴ ഭാഗത്തേക്ക് പോകുകയായിരുന്നു കാർ. ലോറിയുടെ ഡീസല്‍ ടാങ്കില്‍ കാര്‍ ഇടിച്ചുകയറുകയായിരുന്നു.

ഉടൻതന്നെ തീപടർന്നു. ഈ സമയം നാലുപേരാണ് കാറിലുണ്ടായിരുന്നത്. ഉടൻതന്നെ നാട്ടുകാരെത്തി യാത്രക്കാരെ പുറത്തെടുത്തു. ഇതിൽ രണ്ടുപേര്‍ക്ക് ബോധമുണ്ടായിരുന്നില്ല. ടാങ്കര്‍ ലോറിയില്‍ വെള്ളമെത്തിച്ച് തീ അണയ്ക്കാന്‍ നാട്ടുകാര്‍ ശ്രമിച്ചെങ്കിലും ഫലം കണ്ടില്ല. പിന്നാലെ ഫയര്‍ഫോഴ്‌സ് എത്തി തീ അണക്കുകയായിരുന്നു. പരിക്കേറ്റവരെ ആശുപത്രിയിൽ പ്രവേശിപ്പിച്ചിരിക്കുകയാണ്.