മാന്‍ഡോസ് ചുഴലിക്കാറ്റ് ഇന്നു തീരം തൊടും; ചെന്നൈയിൽ കനത്ത മഴ; അതീവ ജാഗ്രത നിർദ്ദേശം

ചെന്നൈ: മാന്‍ഡോസ് ചുഴലിക്കാറ്റ് തീരത്തേയ്ക്ക്. അര്‍ധരാത്രിയോടെ ശ്രീഹരിക്കോട്ടയ്ക്കും പുതുച്ചേരിക്കും ഇടയിലൂടെ കരയില്‍ പ്രവേശിക്കുമെന്നാണു കാലാവസ്ഥ നിരീക്ഷണ കേന്ദ്രത്തിന്റെ മുന്നറിയിപ്പ്. ചെന്നൈയ്ക്കു സമീപമുള്ള മഹാബലിപുരത്ത് കൂടിയാകും കരതൊടുന്നതിനു തുടക്കമാവുകയെന്നാണു സൂചന. നിലവില്‍ ചെന്നൈയില്‍ നിന്നു 400 കിലോമീറ്റര്‍ അകലെയാണു ചുഴലിക്കാറ്റ് സ്ഥിതി ചെയ്യുന്നത്.

ചെന്നൈയിലും പുതുച്ചേരിയിലും ദേശീയ ദുരന്തനിവാരണ സേനയുടെ യൂണിറ്റുകളെ വിന്യസിച്ചിട്ടുണ്ട്. ചെന്നൈയിൽ ഇടവിട്ടുള്ള കനത്ത മഴ തുടരുകയാണ്. മണിക്കൂറില്‍ 12 കിലോമീറ്റര്‍ വേഗത്തില്‍ നീങ്ങുന്ന ചുഴലിക്കാറ്റ് കര കടക്കുമ്പോള്‍ 70 മുതല്‍ 85 കിലോമീറ്റര്‍ വേഗതയില്‍ ആഞ്ഞുവീശും. ഇന്നും നാളെയും മറ്റന്നാളും തമിഴ്നാട്ടിലും പുതുച്ചേരിയിലും ആന്ധ്രപ്രദേശിന്റെ തീരദേശങ്ങളിലും കനത്ത മഴയുണ്ടാകും.

ചുഴലിക്കാറ്റ് മുന്നറിയിപ്പ് കണക്കിലെടുത്ത് ചെന്നൈ,ചെങ്കല്‍പേട്ട്, തിരുവെള്ളൂര്‍ ,കടലൂര്‍ വിഴുപ്പുറം റാണിപ്പേട്ട് തുടങ്ങിയ ആറു ജില്ലകളില്‍ വിദ്യാഭ്യാസ സ്ഥാപനങ്ങള്‍ക്ക് അവധി നപ്രഖ്യാപിച്ചു. കേരളത്തിലും ചിലയിടങ്ങളിൽ ഇടിമിന്നലോട് കൂടിയ ഒറ്റപ്പെട്ട മഴയ്ക്ക് സാധ്യത ഉണ്ടെന്ന് കേന്ദ്ര കാലാവസ്ഥ നീരിക്ഷണ കേന്ദ്രം കഴിഞ്ഞ ദിവസം അറിയിച്ചിരുന്നു.