‘അമ്മ തല്ലുമ്പോള്‍ പോലും നമ്മള് അമ്മയെ വിളിച്ചാകും കരയാറുള്ളത്’, അമ്മയെ കുറിച്ച് നന്ദു പറയുന്നു

കാന്‍സര്‍ എന്ന മഹാമാരിയെ മനക്കരുത്ത് കൊണ്ട് നേരിടുന്നവരില്‍ ഒരാളാണ് നന്ദു മഹാദേവ. ശരീരത്തിന്റെ പല ഭാഗങ്ങളായി കാന്‍സര്‍ കാര്‍ന്ന് തിന്നുമ്പോഴും മനക്കരുത്ത് എന്നത് ഒന്ന് കൊണ്ടാണ് നന്ദു പടിച്ച് നില്‍ക്കുന്നത്. മാത്രമല്ല അമ്മ ലേഖ നല്‍കുന്ന പിന്തുണയും നന്ദുവിന് ശക്തി പടരുന്നു. ഇപ്പോള്‍ അമ്മയുടെ ജന്മദിനത്തോട് അനുബന്ധിച്ച് നന്ദു ഫേസ്ബുക്കില്‍ പങ്കുവെച്ച കുറിപ്പാണ് വൈറല്‍ ആകുന്നത്. അമ്മയ്ക്ക് വേണ്ടി എഴുതിയ കുഞ്ഞ് കവിതയും നന്ദു പങ്കുവെച്ചിട്ടുണ്ട്.

നന്ദുവിന്റെ ഫേസ്ബുക്ക് പോസ്റ്റിന്റെ പൂര്‍ണരൂപം;

ജന്മം നല്‍കി ഇത്രയും വളര്‍ത്തി എന്നെ ഞാനാക്കിയ എന്റെ അമ്മക്കുട്ടിയുടെ പിറന്നാളാണ് ഇന്ന്. പ്രപഞ്ചത്തിലെ ഏറ്റവും മഹത്തായ കര്‍മ്മമാണ് സൃഷ്ടി. ആ സൃഷ്ടി നടത്തുന്ന ശക്തിസ്വരൂപമാണ് അമ്മമാര്‍. സര്‍വ്വ ജീവജാലങ്ങളിലും മാതൃത്വഭാവമുണ്ട്. അത് തന്നെയാണ് ജീവന്റെ നിലനില്‍പ്പിന്റെ അടിസ്ഥാനവും. അമ്മ തല്ലാന്‍ ഓടിച്ചാണ് നമ്മളില്‍ പലരും മരം കയറ്റത്തില്‍ വൈദഗ്ദ്ധ്യം നേടിയിട്ടുള്ളത്. ഞാനൊക്കെ മാവില്‍ കയറിയതിന് കയ്യും കണക്കും ഇല്ല. പക്ഷേ രസം അതല്ല. ‘അമ്മ തല്ലുമ്പോള്‍ പോലും നമ്മള് അമ്മയെ വിളിച്ചാകും കരയാറുള്ളത്. അത്ര ആത്മബന്ധമാണ് നമുക്ക് ‘അമ്മ.

ഞാനുള്ള കാലത്തോളം അമ്മയുടെ കൂടെ തന്നെ ഉണ്ടാവും. എന്നും എപ്പോഴും അമ്മ സന്തോഷത്തോടെ ഇരുന്നാല്‍ മതി എന്നാകും ഓരോ മക്കളുടെയും ഏറ്റവും വലിയ ആഗ്രഹം. എന്റെയും അതുതന്നെ. ചങ്കുകളേ ഇത് ഞാന്‍ അമ്മയ്ക്ക് വേണ്ടി എഴുതിയ ഒരു കുഞ്ഞു കവിതയാണ്.

ജയജയ ജഗദംബേ, ചന്ദനഗന്ധം ചന്ദ്രികഭാവം ചെമ്പകനൈര്‍മല്യം. സുന്ദരനയനം സവിനയഹൃദയം സഹനത സഹിതഗുണം. അമ്മിഞ്ഞപ്പാലമൃതായ്പ്രാണനു മൃതസഞ്ജീവനിമന്ത്രം. പകരുംപകരംപടരുംവിടരും
പരമം മമഹൃദയം. അവളുടെമനമതുമരതകമണിപോല്‍ മതിഹരനിറകരുണം. മൊഴിയതുപൊഴിയുമൊരഴകിനുമഴകാം മിശ്രിത വാത്സല്യം.

പുണ്യംനിന്നുടെയുദരംകാരണമുണരാന്‍ ഉച്ഛ്വസിതം. ജനിതാ ജന്മാ ജ്ഞാനചതുഷ്ടയ ജയജയ ജഗദംബേ. ഹൃദയം നിറഞ്ഞ പിറന്നാള്‍ ആശംസകള്‍ അമ്മാ ?? NB : ഈ കവിത ഭൂമിയിലെ ദൈവങ്ങളായ ഓരോ അമ്മമാര്‍ക്കും അവരെ പൊന്നുപോലെ സ്‌നേഹിക്കുന്ന മക്കള്‍ക്കും സമര്‍പ്പിക്കുന്നു.