പ്രതിരോധ-ഭീകരവിരുദ്ധ രംഗത്ത് ഇമ്മാനുവൽ മാക്രോണുമായി കൈ കോർത്ത് നരേന്ദ്രമോദി

ബാലി. ജി20 ഉച്ചകോടിയുടെ സമാപന ദിനത്തിൽ ഫ്രഞ്ച് പ്രസിഡന്റ് ഇമ്മാനുവൽ മാക്രോണുമായി പ്രധാനമന്ത്രി നരേന്ദ്രമോദി നടത്തിയ കൂടിക്കാഴ്ച രാജ്യത്തിനു നിർണായകമായി. പ്രതിരോധ രംഗത്തും ഭീകരവിരുദ്ധ പോരാട്ടത്തിലും ഇരു രാജ്യങ്ങളും തമ്മിൽ കൈ കോർക്കുന്നതായിരുന്നു ആ കൂടിക്കാഴ്ച. ഏഴ് ലോകനേതാക്കളുമായി ചർച്ചകൾ തീരുമാനിച്ചിരുന്നതിന്റെ ആദ്യ ഘട്ടമായിട്ടാണ് നരേന്ദ്രമോദി-മാക്രോൺ കൂടിക്കാഴ്ച നടന്നത്.

ഇരുരാജ്യങ്ങളും തമ്മിൽ ശക്തമായ പ്രതിരോധ പങ്കാളിത്തവും ഭീകരവിരുദ്ധ പോരാട്ടത്തിലെ സംയുക്തനീക്കവും കൂടിക്കാഴ്ചയിൽ ഉറപ്പുവരുത്തിയതായി വിദേശകാര്യമന്ത്രാലയം ആണ് അറിയിച്ചിരിക്കുന്നത്. നേരത്തെ പ്രതിരോധ രംഗത്ത് ക്വാഡുമായി ചേർന്ന് ഫ്രാൻസ് ഇന്ത്യയ്‌ക്കൊപ്പം നിലയുറപ്പിക്കുന്നതിൽ മാക്രോൺ നയം വ്യക്തമാക്കിയിരുന്നു. റഫേൽ വിമാനങ്ങളിലെ 36 എണ്ണങ്ങളുടെ ആദ്യ കരാറിൽ അവസാനഘട്ടത്തിലെ വിമാനങ്ങൾ കൈമാറിയ ശേഷം ഇതാദ്യമായാണ് മാക്രോണുമായി നരേന്ദ്രമോദി കൂടിക്കാഴ്ച നടത്തുന്നത് എന്നതും ശ്രദ്ധേയം.

ബാലിയിൽ ബ്രിട്ടൺ, ഓസ്‌ട്രേലിയ, ജർമ്മനി, ഇറ്റലി, സിംഗപൂർ, സ്‌പെയിൻ, ഇന്തോനേഷ്യ എന്നീ രാജ്യങ്ങളുടെ തലവന്മാരുമായും നരേന്ദ്രമോദി ഇന്ന് കൂടിക്കാഴ്ചകൾ നടത്തുന്നുണ്ട്. കണ്ടൽ വനസംരക്ഷണവുമായി ബന്ധപ്പെട്ട് തൈനടലുകളിൽ പ്രധാനമന്ത്രി പങ്കെടുത്തു. ആഗോളതലത്തിൽ സമുദ്രതീരങ്ങളിലും ജലാശയങ്ങളിലും കണ്ടൽ നടേണ്ടതിന്റെ ആവശ്യകത കോപ്27ൽ ലോകരാജ്യങ്ങൾ ഊന്നിപ്പറഞ്ഞിരുന്നു. ജൈവ ആവാസ വ്യവസ്ഥയ്‌ക്കായി കണ്ടൽവനങ്ങൾ വളരേണ്ട ആവശ്യകത നരേന്ദ്രമോദി ലോകത്തെ ഓർമ്മിപ്പിച്ചു.