ബെംഗളൂരു–മൈസൂരു ഗ്രീൻഫീൽഡ് ഹൈവേയുടെ ഉദ്ഘാടനം മാർച്ച് 11ന് പ്രധാനമന്ത്രി നരേന്ദ്രമോദി നിർവഹിക്കും

ബെംഗളൂരു. ബെംഗളൂരു–മൈസൂരു 10 വരി ഗ്രീൻഫീൽഡ് ഹൈവേയുടെ നിർമാണം അവസാനഘട്ടത്തിൽ. സംസ്ഥാനത്തെ ഏറ്റവും വലിയ വികസന പദ്ധതിയായി ബിജെപി സർക്കാർ ഉയർത്തിക്കാണിക്കുന്ന പാതയുടെ ഉദ്ഘാടനം അടുത്ത 11നു പ്രധാനമന്ത്രി നരേന്ദ്ര മോദി നിർവഹിക്കും. കർണാടക നിയമസഭാ തിരഞ്ഞെടുപ്പിനു രണ്ടുമാസം മാത്രം ബാക്കിനിൽക്കെയാണ് പുതിയ റോഡിന്റെ ഉദ്ഘാടനം.

റോഡ് തുറക്കുന്നതിൽ ഏറ്റവും കൂടുതൽ സന്തോഷിക്കുന്നതു മലയാളികളാണ്. മലബാറിൽ നിന്നുളള ആളുകൾക്ക് ഏറ്റവും കൂടുതൽ പ്രയോജനപ്പെടുന്ന റോഡാണ് ബെംഗളൂരു–മൈസൂരു 10 വരി ദേശീയപാത. 117 കിലോമീറ്റർ ദൂരമുളള ഈ റോഡ് 50000 കോടി രൂപ മുടക്കിയാണ് വികസിപ്പിച്ചിരിക്കുന്നത്.

6 വരി പ്രധാന ഹൈവേയും രണ്ടു വശങ്ങളിലുമായി രണ്ടു വരി സർവീസ് റോഡുകളുമാണ് നിർമിച്ചിരിക്കുന്നത്. നിലവിൽ ബെംഗളൂരുവിൽനിന്ന് മൈസൂരിലേക്ക് 3 മുതൽ 4 മണിക്കൂർ യാത്രാസമയം വേണ്ടുന്നിടത്ത് പുതിയ പാതയിൽ ഒരു മണിക്കൂർ പത്ത് മിനിറ്റു സമയമായി കുറയ്ക്കാൻ സാധിക്കും.