സമൂഹ മാധ്യമത്തിലൂടെ പരിചയപ്പെട്ട സ്ത്രികളെ കബളിപ്പിച്ച് സ്വത്ത് അപഹരിക്കുന്നയാൾ ആലപ്പുഴയിൽ പിടിയില്. ഇടുക്കി പീരുമേട് കൊക്കയാർ വെംബ്ലി വടക്കേമല തുണ്ടിയിൽ അജിത്ത് ബിജുവാണ് (28) പിടിയിലായത്. പണവും സ്വർണാഭരണവും തട്ടിയെടുത്തെന്ന് ചെങ്ങനൂർ സ്വദേശിനിയുടെ പരാതിയിലാണ് അറസ്റ്റ്. സമൂഹ മാധ്യമത്തിൽ സജീവമായ അജിത്ത് ബിജു സമാന കേസിലും അറസ്റ്റിലായിട്ടുണ്ട്.
സമൂഹ മാധ്യമങ്ങള് വഴിയാണ് അജിത്ത് ബിജു തട്ടിപ്പ് നടത്തുന്നത്. ടിക്ക് ടോക്കിൽ സജീവമായ അജിത്തിന്റെ ഇപ്പോഴത്തെ തട്ടകം ഇൻസ്റ്റാഗ്രാം ആണ്. പർപ്പിൾ മെൻ മിസ്റ്റർ അജിത്കൃഷ്ണ എന്നായിരുന്നു ഇയാളുടെ ഇൻസ്റ്റാഗ്രാം ഐഡി. ഇൻസ്റ്റാഗ്രാം വഴി പെൺകുട്ടികളെ പരിചയപ്പെട്ട് പ്രണയം നടിക്കും തുടർന്ന് ഓരോ ദുരിതങ്ങള് പറഞ്ഞ് സ്വർണവും പണവും തട്ടിയെടുക്കും. തിരികെ ചോദിച്ചാല് ഭീഷണിപ്പെടുത്തും. ഇത്തരത്തിൽ ചെങ്ങനൂർ സ്വദേശിനിയുടെ കയ്യിൽ നിന്ന് ഒന്നര ലക്ഷം രൂപയും സ്വർണാഭരണവും തട്ടിയെടുത്തെന്നാണ് പരാതി.